BIRA

Igandea

Onintza Enbeita -

2018ko irailak 23
AAgian irribarre batekin esnatuko zinen gaur, atzoko parranda gogoan. Litekeena da herriko jaien azken eguna izatea, eta bestondoari eutsi ezinda jaitsiko zara herriko plazara. Han ari dira dantza taldekoak eguzkipean jo eta su: badago zu baino okerrago dagoenik ere. Gerta daiteke gaua maitalearekin pasatu izana. Orduan, zure bertsiorik onena itzuliko dizu ispiluak: distira berezia daukazu azalean, besoetan ubeldurak izan arren. Ohean, zure betiko bikotekidearekin ia betiko posturan larrutan egin baduzu, lasai esnatuko zara. Okerrago daude gau osoan norbaiten bila ibili eta bakarrik lo egin behar izan dutenak. Azkenean, hobe da bat eskuan ehun hegan baino. Ospitalean ere egon zintezke: gaixorik dagoen senide batekin. Holakoetan biharamunarekin baino gogorragoak egiten dira igandeak.

Modu batera edo bestera, egunkariak igandea dela esango dizu, eta arratsalderako jende guztia triste dagoela ohartuko zara. Ez dakit zergatik bihurtu diren igandeak astelehenerako trantsizio huts. Sistema kapitalistak igandeez gozatzeko aukera ostu egin digula dirudi. Bada, bizitza ideala gauza bat da, baina, bizitza normalean, larunbatean gertatzen ez dena igandean gerta daiteke. Eman diezaiogun igandeari ere aukera bat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna