ETA desagertuta «gogoeta orokorrak» egiteko aukera irekitzen dela diote adituek

Ipar Irlandako eta Euskal Herriko bake prozesuen inguruko jardunaldiak antolatu ditu EHUk Bilbon. Gaiari hainbat arlotatik heldu diote
Brandon Hamber, Jon Mirena Landa eta Pat Colgan, atzo.
Brandon Hamber, Jon Mirena Landa eta Pat Colgan, atzo. MARISOL RAMIREZ / FOKU

Gotzon Hermosilla -

2018ko maiatzak 17
EHU Euskal Herriko Unibertsitateko Giza Eskubide eta Botere Publikoaren Katedrak antolatuta, Irlanda eta Euskadi, indarkeriaren osteko egoera eta balantzea izeneko jardunaldiak egin dituzte Bizkaia aretoan (Bilbo). ETA desegin ostean gaiari bere osotasunean oratu eta «gogoeta orokorrak» egiteko aukera zabaltzen dela uste dute adituek, eta, horregatik, diziplina arteko mintegia antolatu du katedrak, arlo askotako adituak gonbidatu dituzte, eta gai asko jorratu: biktimen arta, presoen auzia, gaia eskoletan landu beharra, egiaren batzordeak, eta abar.

Katedraren zuzendari Jon Mirena Landak azaldu duenez, jakitun dira korapiloa ez dela askatuko soilki arlo akademikotik: «Gure ekarpen txikia egin nahi izan dugu», esan du, «gai guztiak mahai gainean jarriz, hau da, bake prozesuari buruzko hausnarketa orokorra, eta aldi berean arloz arlokoa». Jardunaldien ondorioekin liburuxka argitaratzeko asmoa dute.

Adituen artean Pat Colgan Irlandako Gobernuaren aholkularia eta Brandon Hamber Belfasteko (Ipar Irlanda) Unibertsitateko irakaslea egon dira: Ipar Irlandako kasua izan dute hizpide, baina Hego Afrikako eta Kolonbiako adibideak ere aipatu dituzte. «Beti da interesgarria beste herrialdeetako eskarmentua ezagutzea», esan du Landak, «ez hona transferitzeko, ispilu eta inspirazio iturri gisa baizik».

Aspaldi honetan denen ahotan bolo-bolo dabilen kontakizunaren gaia ere agertu da jardunaldietan: «Nik uste dut ideologia askotariko adituak bat datozela kontakizun bakarra ezarri nahia ez dela erreala, eta seguru asko kontakizun bat baino gehiago egongo dela, partekatutako oinarri etiko batetik abiatuta», esan du Landak. «Honek luze joko du, eta jardunaldien asmoa ez zen berehalako emaitzak lortzea, baina ni baikorra naiz».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna