Albistea entzun

Euskararen lege «integral» bat aldarrikatu du Kontseiluak

Herritarren hizkuntza eskubideak bermatzeko beharra eztabaidagai izan dute hainbat adituk Iruñean, UEUk antolatutako jardunaldietan
UEUk antolatutako topaketa, atzo.
UEUk antolatutako topaketa, atzo. IÑIGO URIZ / FOKU Tamaina handiagoan ikusi

Ion Orzaiz -

2018ko irailak 30 - Iruñea

Nafarroako herritarren hizkuntza eskubideak juridikoki aitortuak izan daitezen, bide bakarra ikusten du Kontseiluak: euskararen ofizialtasuna. «Ez dago beste aukerarik, instituzioek eskubideak bermatzeko betebeharra izan dezaten». Nafarroako Legebiltzarrean euskararen lege berri bat idazteko batzorde berezia lanean dela baliatuz, proposamen propioa ondu du Kontseiluak, eta horren aurkezpena egin zuten atzo Iruñean, UEU Udako Euskal Unibertsitateak antolatutako Hizkuntza eskubideak bermatzeko Legearen bidean jardunaldien barruan.

Euskararen lege «integral» bat ezartzearen beharraz hitz egin zuen Paul Bilbao Kontseiluko idazkari nagusiak bere hitzaldian: «Eremu guztietan eragingo duen legea behar da; administrazioan, hezkuntzan, hedabideetan, kulturan, eremu sozioekonomikoan...». Bilbaok garrantzitsutzat jo zuen, halaber, herritarrak «legearen eztabaidaren erdigunera» eramatea: «Legeek herritarrei eragiten diete, beraz, lege berriak amaitu beharko du gaur egun herritarren artean dagoen bereizkeria».

Euskal hiztunen protagonismoa nabarmentzeko, esan zuen Kontseiluak hainbat egitasmo abiatu dituela azken hilabeteetan, «nafarrek euskaraz bizitzeko dituzten ezintasunak eta oztopoak» agerian utzita. Herritarrek eginiko ekarpenez gainera, Kontseiluak oinarri gisa hartu du Hizkuntza Eskubideen Babeserako Protokoloa, lege proposamen propioa ontzeko tenorean.

Bilbaoren esanetan, ofizialtasuna Nafarroa osora zabaltzea «ezinbestekoa» izanen da, lege proposamenaren helburuak betetzeko bidean: «Batetik, herritar guztiei eskubide berak aitortzeko, eta, bestetik, ofizialtasunak ezartzen dituen ondorio juridikoak betetzeko politikei heldu ahal izateko». Gogoratu zuen, halaber, euskararen legea garatu ahal izateko, beste zenbait arau eta irizpide aplikatu beharko direla: «Horietan, malgutasuna eta progresibitatea aplikatu beharko dira, baina ofizialtasuna ezartzea eta horren ondorio juridikoak aintzat hartzea izan beharko dute aldaketarako lege berriaren ardatz».

Valentzieraren ispiluan

Kontseiluaz gainera, beste hainbat eragilek ere parte hartu zuten UEUren mintegian. Egun indarrean dagoen euskararen legearen iraganaz mintzatu zen Roldan Jimeno NUPeko Zuzenbidearen Historia irakaslea. Horren ostean, euskararentzako «marko juridiko berri baten beharraz» aritu zen Iñigo Urrutia Zuzenbidean doktore eta EHUko irakaslea; eta Olatz Altunak, berriz, Nafarroako egungo egoera soziolinguistikoa izan zuen hizpide, zonifikazioaren ikuspegitik. Azkenik, egungo legediaren gabeziak mintzagai izan zituzten Koldo Colomo euskara teknikariak, Ivan Gimenez kazetariak, Iulen Urbiola Baztango udal idazkariak eta Iñigo Orella nekazari ingeniariak.

Euskal Herritik kanpoko ekarpenik ere egon zen: valentzieraren erabilerarako legean ere zonifikazioa badagoela gogoratu zuen Alfons Esteve Valentziako Unibertsitateko hizkuntza politikako zerbitzuburuak.Valentziera deitzen zaio Valentziako Autonomia Erkidegoan erabiltzen duten katalanari. Nafarroakoak bezalaxe, hango legeak ere ia anbiziorik ez duela azaldu zuen: «Ez da valentziera normalizatzeko xedea duen legea». Estevek adierazi zuen azken urteetan aldaketak izan direla hizkuntza politikan, «baina oraindik ez da ausardiazko urratsik egin». Gogorarazi zuen, Nafarroan bezala, Valentzian ere posible dela hizkuntza propioa ikasgai gisa ere ez izatea, gurasoek hala hautatzen badute. Aurrera begira zonifikazioa gaindituko duen legea aldarrikatzeaz gainera, lege horrek izan beharreko edukiak ere aletu zituen unibertsitateko adituak: besteak beste, valentziera gizartean orokortzea, administrazioko erabilera hizkuntza bihurtzea, langile publikoek bi hizkuntza ofizialetan lan egiteko gaitasuna akreditatzeko beharra ezartzea, berezko hizkuntzaren ezagutza pasiboaren derrigortasuna eta valentzieraren eremu sozioekonomikoa nahiz kultura indartzea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Hilekorako produktuen BEZa %10etik %4ra jaitsiko du Madrilek

Uxue Rey Gorraiz

Preserbatiboei eta medizinalak ez diren antisorgailuei ere eraginen die merkatzeak; pixoihalei, ez.

Hablamos español elkartearen protesta Madrilen, joan den astean. ©FERNANDO ALVARADO, EFE

«Zelan erdaldundu Euskal Herria?»: dekalogo bat eman du Euskal Encodingsek

Uxue Rey Gorraiz

Espainiako epaile batek «gaizkile txiki bat» sortzeko dekalogoa eman zuen joan den hamarkadan. Hori oinarri, eta begirada euskarara zuzenduz, beste bat argitaratu du Euskal Encondingsek: Etxean erdaldun txiki bat sortzeko dekalogoa. Hamar gako dira, ironiaz biziturik.

Elbira Zipitriaren estatuaren aurkezpena, Gipuzkoako foru jauregian. ©Gipuzkoako Foru Aldundia

Elbira Zipitriaren estatua bat jarri dute Gipuzkoako foru jauregian

Julen Otaegi Leonet

Lehenbizikoz, andre baten eskultura bat jarri dute jauregiko ohorezko patioan; Gipuzkoaren historiako izen handientzat gordetako espazioa da.

Imanol Pradales Sestao e Areetako metro geltokiak lotuko ditun trenaren aurkezpenan. ©Bizkaiko foru aldundia

Sestaoko eta Areetako metro geltokiak lotuko dituen trenak ez du makinistarik izango

Mikel Garcia Martikorena

Itsasadarraren azpitik igaroko den tren baten bidez, Bilboko Metroko lehenengo eta bigarren lineak lotuko dira.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...