Borroka aldapatsua

Le Maire Finantza ministroaren etxera martxa egin dute Seaskako gurasoek, ikasleek eta irakasleek. Postu gehiago galdegin dituzte
BOB EDME

Eihartze Aramendia Iparragirre -

2018ko ekainak 3
Mendian du bigarren etxebizitza Bruno Le Maire Frantziako Finantza ministroak. Patar malkartsuak igaro behar dira zenbaitetan haren etxera iristeko. Halaxe gertatzen ari da Seaskako ikastolen ikasturte bukaera ere. Gustuko tokian aldaparik ez, eta, igo beharreko malda gustukoa ez izanagatik ere, 500 lagun baino gehiago abitu ziren atzo aldarrikapen indarrez beterik Senpereko (Lapurdi) plazatik Le Maire ministroaren etxeraino. Heldu den eskola sartzerako ikastoletan behar dituzten 25 irakasle postuek eraman zituzten ahalegin hori egitera.

Maiatzaren 4an Baionan egin zuten danborradako uneak gogoan, hainbat ikasle, guraso eta irakasle danborrak eskuan joan ziren martxa, eta Sarriegiren martxari egokitutako hitzak kantatu zituzten berriz ere. Kasu! Ikastola kexu leloa eraman zuten martxaren buruko pankartan, eta jendearen ahoan ere bai. Kilometro eta gehiagoko bidea egin zuten. Poliziaren zaintzapean beti, hiru ordu laurdeneko ibilbidea egin eta gero ailegatu ziren helburura, Finantza ministroaren harrizko etxe dotorearen aitzinera. Batzuk harrituta, ez baitzuten espero poliziek utziko zietenik etxearen hesiraino hurbiltzen.

Han bildurik, Seaskako ordezkari Peio Jorajuriak hitza hartu zuen, bigarren etxebizitzen aferari keinu eginez lehenik: «Euskal Herriko gazte anitzek nahiko lukete halako etxe bat, ez bigarren egoitza gisa, baizik eta bizileku gisa». Jarraian heldu zion bertara joatearen xedeari, eta ohartarazi zuen Frantziako aurrekontuetan ez zutela kontuan hartu Seaska, Diwan, Calandreta, Bressola eta ABCM eskolak «garapen etengabean» daudela. «Gure haurren hezkuntza Parisko bulegoetako finantza arduradunen esku uzten dugu, baina jakin ezazue ez dugula sekula gure herriaren geroa hezkuntza gastu gisa konprenitzen dutenen esku utziko», azaldu zuen Jorajuriak.

Postuak ez dira aski

Aurrekontuena «argudio faltsua» dela nabarmendu zuen, postu kopuruak aipatuz. Izan ere, hastapenean esan zieten posturik ez zutela emango; gero lau postu izango zirela hitzeman zieten, eta ondoren, bost eta erdi. Postu horiek aski ez direla arrazoitzeko, adibide batzuk eman zituen: besteak beste, lizeoan eta Baionako kolegioan irekiko dituzten gelak direla eta, jadanik sei postu beharko dituzte. «Zer eginen dugu, beraz, beste 34 ikastolekin? Zer eginen dugu ikastola guzietara heldu diren 230 ikasle gehiagorekin?».

Kontua Seaskaren eta Hezkuntza Ministerioaren arazo gisa hasi bazen ere, orain Euskal Herriaren eta Frantziako Estatuaren arteko arazo bilakatu dela esan zuen, «ministerioak izenpetu hitzarmena ez baitu bete». Tokiak eskaintzen dituen bistekin, piknik bat eginez bukatu zuten martxa, hurrengo desmartxari ekiteko prest.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna