Albistea entzun

Erne Lasorekin eta Imazekin

Bizkarreta-Gerendiaingo aurrelariak eta Oiartzungo atzelariak nagusitasunez irabazi diete Peña II.ari eta Albisuri: 22-11
Unai Laso, pilota jotzear, atzo, Labriten jokatutako binakako partidan.
Unai Laso, pilota jotzear, atzo, Labriten jokatutako binakako partidan. IDOIA ZABALETA / FOKU Tamaina handiagoan ikusi

Julen Etxeberria -

2021eko azaroak 28

Horren sasoiko eta horrenbesteko jokoarekin eta konfiantzarekin dabil Unai Laso, edozein atzelari jarrita ere, bikote benetan indartsua osatuko zuten; edonori irabazteko modukoa. Baina Bizkarreta-Gerendiaingo (Nafarroa) aurrelariak profesionaletara itzuli denetik daraman bolada gozoari gehituz gero enpresak Binakako Txapelketan jarri dion bikotekidea, Ander Imaz, bizkartzain lanetan oso ondo ari dela, emaitzak derrigorrez izan behar du oso ona. Eta halakoa da: bi partida jokatu dituzte lehen ligaxkan, eta biak irabazi dituzte; biak nagusitasun handiz, hogei tanto besterik ez jasota. Horri esker, sailkapenaren buruan daude.

Lider eta konfiantzaz lepo; halaxe daude. Eta ez da gutxiagorako. Abisua eman zuten aurreneko jardunaldian, Mikel Urrutikoetxeari eta Aitor Arangureni alde handiz irabazita: 22-9. Atzo, berriz, kolpea eman zuten mahai gainean, antzeko nagusitasunarekin hartu baitzituzten mendean azkeneko binakakoaren txapeldunordeak. 22-11 irabazi zieten Jon Ander Peñari eta Jon Ander Albisuri, Iruñean, Labrit pilotalekuan. Txapelketa hasi besterik ez da egin, eta lau hilabetean makina bat gorabehera egon ohi da. Baina Laso-Imazek jada agerian utzi dute oso kontuan hartzeko bikotea osatzen dutela.

Bizkarreta-Gerendiaingoak eta Oiartzungoak (Gipuzkoa) oso argi zuten zer egin behar zuten Peña II.a-Albisuri irabazteko aukeraren bat izateko: huts gutxi egitea eta partida gogortzea. Hori egin ezean, nekez izango zuten zer eginik. Baina gauza bat da egitekoa argi izatea eta beste bat, argi izanda ere, hori egin ahal izatea. Aurkariek badute zer esana horretan, eta are gehiago Peña II.a-Albisu bezalako bikote indartsu batek. Lehen jardunaldian erakutsi zuten lehengo lepotik zutela burua.

Ataundarraren kolpeak kezkatzen zituen gehien Laso-Imaz. Barneratuta zuten, ezusterik ezean, hura nagusituko zela atzean, eta biek gogotik egin beharko zutela lan hari eusteko. Baina, aspaldikoz, Albisu oso gorabeheratsu aritu zen: bi tanto egin zituen, baina zazpi pilota huts egin. Gaizki ekin zion norgehiagokari, gora egin zuen gero, baina berehala egin zuen behera. Peñak ezer gutxi lagundu ahal izan zion: bost tanto egin zituen, eta lau galdu. Ez zen izan txapeldunordeen eguna.

Bai, ordea, Laso-Imazena. Ia dena egin zuten ondo: indartsu hasi ziren (6-3); eutsi egin zuten kontrarioek lehen estutua eman zietenean (7-7); eta hautsi egin zuten gero (22-11). Jarraian lortu zituzten azken sei tantoak. Laso nabarmendu zen berriro, ikusgarri aritu baitzen, gozatuz eta gozaraziz: hamar tanto egin zituen, eta hiru huts egin. Imazek ederki lagundu zion berriz: bat egin zuen, eta beste bat huts egin.

Jotzaileen lehia gaur

Jardunaldiak gaur izango du segida. Elezkano II.a-Zabaleta eta Irribarria-Rezusta ariko dira elkarren aurka Azkoitian (Gipuzkoa). Bi bikoteek ondo ekin diote txapelketari, aurreneko partida irabazita. Jotzaileen arteko lehia espero da: Zabaleta batetik, eta Rezusta bestetik. Lehia horretan nagusitzen denak urrats handia egingo du garaipena lortzeko bidean. Elezkano II.ak eta Irribarriak, berriz, oso adi egon beharko dute, izan ditzaketen aukerak aprobetxatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ondarroako arraunlariak arraunak gora, eta Iñigo Larrinaga patroia banderarekin, atzo, herrian, garaipena zaleekin ospatzen. ©ARITZ LOIOLA / FOKU

Ametsa baino hobea

Aitor Manterola Garate

Ondarroak etxean irabazi du Eusko Label ligako estropada, lehen txandatik. Marea eta haize aldaketa, eta itsaslaster handiak erabakigarriak izan dira
Orioko eskifaia poz betean atzo, Ondarroako estropada irabazi berritan. ©ARITZ LOIOLA / FOKU

Oriok gaur bertan irabaz dezake Euskotren liga

A. Manterola Garate

Nahikoa izango du Arraun Lagunaken aurretik sailkatzea Castro Urdialesen, atzo Ondarroan bederatzigarren estropada irabazi eta gero
 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
<b>Mikel Larrañaga, iaz, Urrezko Kopa irabazi berritan.</b> ©IÑIGO URIZ / FOKU

Sei aizkolari ariko dira bihar Donostian, Urrezko Kopa xede

Berria

Aurrez kanporaketa gainditutako kirolariek udako garaikur nagusia izango dute jokoan, 19:30ean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.