«BIKIN GORA!»

Ba!

Estitxu Zabala - Hernani klubeko arraunlaria

2017ko ekainak 16
Atzean geratu dira euripean, ilunpean edo hoztuta egindako entrenamendu saioak. Uda ate joka ari da, eta jarritako helburuak betetzera aterako gara guztiak. Milaka izango dira bizipenak, irailera arte; algarak eta malkoak, ezintasunak eta amorruak, kafeak, luzaketak, joan-etorriak, lesioak... guztiek osatuko dute denboraldia.

Kuadrilla egokiena hautatuko du entrenatzaile bakoitzak, eta estropada jatera irtengo dira talde guztiak. Izenburuko oihuak emango dio irteera estropadari: «Ba!». Pala uretan duela, bere indar guztia aterako du arraunlariak; besoak luzatuta, bizkarra atzera botako du, hankekin lagunduta, eta atzera iritsitakoan, besoak bildu eta berriro luzatuko ditu, gorputzarekin aurrera egiteko. Eta horrela, luze osoan. Ziaboga iristean, patroiak zuzenduko du maniobra: zia eta kalka egingo dute ababorrek, paladak ematen jarraituko dute istriborrek, arraun txikia sartuko du aurrekalariak, ontzia biratu, eta segi. 1,5 itsas milia egingo ditugu emakumeok; eta horren bikoitza gizonek. Eman eta eman, beste sekreturik ez du kirol honek.

Indartsuak dira batzuk, ahulagoak gara beste batzuk; urduritasunarekin barre egingo dute batzuek, serio egongo gara beste batzuk; eskuak esparatrapuz beteko dituzte batzuek, ipurdian silikonazko txanoa jarriko dugu beste batzuok; ilea bilduko dute batzuek, bisera jantziko dugu beste batzuok... edonola ere, denek gauza bera izango dugu buruan: estropada hasi eta bukatzea, gure onena emanda.

Arraunzaleei udaz gozatzea opa dizuet, eta arraunlariren baten gertukoa bazara: bikotekide, guraso, anai-arreba, lagun, lankide... pazientzia izan ezazu harekin, eta ulertu itzazu haren umore aldaketak. Entrenatzaile, lasai hartu. Arraunlari, eutsi tiborta... prest.... ba!

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna