Albistea entzun

«Alde egotea ez da nahikoa»

«Euskararen normalizazioa azkartzera» konprometitu dira 30 erakunde. «Elkarlanaren fasea» ekintza zehatzekin gauzatu behar dela adierazi dute Korrikaren antolatzaileek
Korrikaren antolatzaileen egitasmoarekin bat egin duten erakundeetako ordezkariak, atzo, Pasaiako Albaola itsas museoan.
Korrikaren antolatzaileen egitasmoarekin bat egin duten erakundeetako ordezkariak, atzo, Pasaiako Albaola itsas museoan. GORKA RUBIO / FOKU Tamaina handiagoan ikusi

Jokin Sagarzazu -

2019ko martxoak 24 - Pasaia

«Historia egitera zoazte», ohartarazi zion atzo Mertxe Mugika AEK-ko koordinatzaileak CCOOko Kerman Galarzari. Bera izan zen lehena agiria sinatzen. Testu horretan azaltzen dira, gainera, sindikatu horrek hartu dituen konpromiso zehatzak, erakunde horren egunerokoari eragiten diotenak. Idatzita geratu dira, eta, beraz, bete dituzten ala ez ikusi ahalko da etorkizunean. Horregatik Mugikaren abisua, CCOOkoari eta haren ostean taulara igo ziren beste guztiei.

21. Korrikaren antolatzaileek Aro berriari, klika egitasmoa aurkeztu zuten atzo Pasaiako Albaola itsas museoan (Gipuzkoa). Horrekin bat egin duten 30 erakunde eta taldeetako ordezkariak izan ziren ekitaldian. Testuan azaltzen diren xedeekin bat egin dute horiek denek, eta nork bere konpromiso propioak gaineratu dizkio agiriari, erakunde bakoitzak egin beharrekoak.

Egitasmoaren helburua da euskararen normalizazioan aurrerapausoak ematea. Baina norbanakoen konpromisoetatik haratago, erakundeak inplikatu nahi dituzte horretan: «Fase berri bat ireki». Mugikak atzo azaldu zuenez, Korrikaren antolatzaileek bilera ugari egin dituzte hainbat arlotako eragileekin azken hilabeteetan, Korrikaren aurtengo leloa den Klika «kontzeptua» azaltzeko, eta, nabarmendu dutenez, «oso erantzun ona» jaso dute: «Guztiek erakutsi digute prest daudela urratsak egiteko». Mugika AEKren koordinatzaile nagusiak eta Asier Amondo Korrikako arduradunak azpimarratu dute «elkarlan esparru berriak» zabaltzen jarraitu behar duela euskalgintzak, eta xede horri erantzuten diola egitasmoak.

Sinatzaileen artean daude, besteak beste, EAJ eta EH Bildu alderdi politikoak, ELA, LAB eta CCOO sindikatuak, unibertsitateak, Eusko Legebiltzarra —talde guztien babesarekin— eta Nafarroako Parlamentua, eta hainbat arlotako gizarte eragileak; besteak beste, Ongi Etorri Errefuxiatuak taldea eta Save the Children. Eragile gehiagok bat egitea espero dute. Horretarako, korrika.eus webgunean atal berezi bat zabaldu dute. Sinatzaileez gain, hor ikus daitezke erakunde bakoitzak hartu dituen konpromisoak.

Horietako batzuk soilik Korrikak iraun bitartean beteko dituzte —apirilaren 4tik 14ra—; baina gehienek epe luzeko izaera dute. Oro har, erakundeak konprometitu dira euskararen ezagutza eta erabilera sustatzera, barrura begirako jardunetan eta kanpokoetan, neurri eta maila ezberdinetan.

Erakundeetako ordezkariek ez zuten azalpenik eman atzoko ekitaldian. Txalupa batean iritsi ziren, agiria sinatu zuten, eta Albaola fundazioko presidente Xabier Argoterekin bisita gidatua egin zuten museoan zehar eta han dagoen itsas ontzigintza eskolan.

Hitza hartu zuten bakarrak izan ziren Mugika eta Amondo. Egitasmoaren hitzaurrea irakurri zuten. Azken urteetan euskararen normalizazioan egindako urratsak nabarmendu zituzten; Korrikaren aurreko bi aldiak, bereziki. Azkenekotik gogoratu zuten Hendaia eta Irun arteko Santiago zubian euskalgintzako eta erakundeetako ordezkariek batera egin zuten argazkia, «elkarlanaren fasera igarotzeko garaia zela adierazteko». Handik gutxira iragarri zen Euskaraldia. Egitasmo horretan izandako parte hartzea nabarmendu zuten Mugikak eta Amondok atzo, baina adierazi zuten hori ez dela nahikoa. Ohartarazi zuten euskararen alde «egote hutsak» ez duela normalizazioa ekarriko. «Ez da etorriko soilik norbanakoon konpromisoetatik, baizik eta ikuspegi hori gizartearen atal guztietan modu transbertsalean txertatuta». «Hizkuntza politika integralak abiatzeko eta garatzeko» garaia dela azpimarratu dute: «Neurri politikoak eta sozialak behar dira».

Informazio gehiago: www.korrika.eus/aroberriariklika.html

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

‘Komikia: euskal komikia 1975etik’ erakusketa ibiltaria. ©Aritz Loiola / FOKU

Historia kontatzeko manera

Zihara Jainaga Larrinaga - Bizkaiko Hitza

Euskal komikigintza ezagutarazteko, ‘Komikia: euskal komikia 1975etik’ erakusketa ibiltaria hartuko du Ugaoko Jane jauregiak otsailaren 3ra arte. Kike Infame eta Mikel Begoñak komisariatu dute.

Ihintz Oliden, AEK-ko Ipar Euskal Herriko koordinatzailea. ©Guillaume Fauveau

«Zaila da irakasleak atzematea eta atxikitzea»

Iñaki Etxeleku - Ipar Euskal Herriko Hitza

Urrian, AEK-k erakundeei galdegin zien laguntzak emenda ditzatela bere irakasleek hilabete sari duinak ukan ditzaten. Ez da deus aitzinatu geroztik, baina ikasleen galdea beti berdin azkarra da.

 ©BERRRIA / BERRIA

«Zergatik egon behar dut nik kontrolpean?»

Maite Asensio Lozano

Manuelaren senar ohiak eskumuturrekoa darama. Manuela hiltzen saiatu zen. Gizonak maiz uzten du gailua kargatu gabe, eta, alarmak etengabe jotzearen ondorioz, antsietate arazoekin dabil emakumea.

Miramonen ospatu dute festa, eta Zientzia eta Teknologia Parkearen eraikin nagusiko aretoa lepo bete dute. ©MAIALEN ANDRES/FOKU

Sexu identitateari buruzko ikus-entzunezko pieza didaktikoak sortu ditu Naizen elkarteak

Jone Arruabarrena

Adingabe Transexualen Gurasoen Elkarteak urteroko jaialdia ospatu du, eta ikus-entzunezko bost piezak osatzen duten proiektua aurkeztu dute, baita diseinu berri batekin apaindutako kamisetak ere

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.