Errusia epaitzeko auzitegi bat eskatu du europarlamentuak

Europako Parlamentuak ebazpen bat onartu zuen atzo nazioarteko auzitegi berezi bat sortzeko, Errusiak Ukrainan egindako gerra krimenak eta horien egileak epaitzeko; besteak beste, Kremlineko goi kargudunak eta militarrak. Nazioarteko Zigor Auzitegiak auzia ikertzeko jurisdikziorik ez duenez —ez Ukrainak eta ez Errusiako Federazioak ez baitute berretsia Erromako Estatutua—, eurodiputatuek uste dute nazioarteko auzitegi berezi bat sortuz erantzun behar zaiola gerra krimenak ikertzeko «hutsune horri». Beraz, diputatuek Europako erakundeen sostengua galdegin zuten luzamendurik gabe oinarri juridiko egoki bat eratzeko, eta, horrela, auzitegi berezi hori sortzeko.