Albistea entzun

Gazteentzat sinesgarriagoak dira egunkarien guneak, telebista baino

Europako zortzi estatutan egin duten ikerketak belaunaldien arteko aldeak nabarmendu ditu
Tamaina handiagoan ikusi

Edu Lartzanguren -

2018ko azaroak 18

Belaunaldien arteko arrakala handitzen ari da, informazio iturririk gogokoenei dagokienez behintzat. AEBetako Pew Research Center erakundeak ikerketa bat egin du Europako mendebaldeko gazteen artean, eta ondorio nagusia hauxe da: 30 urtetik beherako europarrak telebistako albistegietatik urrundu dira, eta, informatzeko, nahiago dituzte egunkarietako webguneak.

Zortzi estatutan egin dute ikerketa: Alemanian, Danimarkan, Erresuma Batuan, Espainian, Frantzian, Herbehereetan, Italian eta Suedian. 18 eta 30 urte artekoak kritiko dira hedabideekin: zortzi estatuetatik bostetan, 50 urtetik gorakoek baino askoz mesfidatiagoak dira haiekin. Alemanian, Herbehereetan eta Suedian, gazteen erdiek baino gehiagok esaten dute hedabideak fidagarriak direla, baina kopurua ez da haietan %57 (Suedia) baino handiagoa. Gazteak Espainiako hedabideekin fidatzen dira gutxien (%26). Frantzia salbuespena da: gazteak 50 urtetik gorakoak baino hiru puntu gehiago fio dira hedabideez (%37).

Baina belaunaldien arteko aldaketarik nabarmenena, ikerketaren arabera, konfiantzazko informazio iturrietan dago. Gazteek, oro har, 50 urtetik gorakoek baino bi aldiz gehiago kontsumitzen dituzte albisteak Interneten bidez, telebistan baino. Zaharrenentzat, ordea, telebista da informazio iturri nagusia. Esaterako: Frantzian 50 urtetik gorakoen %86k egunero ikusten dituzte telebistako albistegiak; gazteen artean, ordea, %44k bakarrik. Espainian %89 eta %68 dira proportzioak. Danimarkan eta Frantzian, telebistako albistegirik inoiz ikusten ez duten gazteen kopurua %24 da; Espainian, %10.

Horrez gain, estatuz estatu eta hedabidez hedabide aztertuta, egunkarien webguneak dira gazteen informazio iturririk gogokoenak. Edonola ere, gazteek askoz gutxiago irakurtzen dituzte paperezko egunkariak zaharragoek baino: 30 urtetik beherakoek, erdia irakurtzen dute paperean egunero, 30-49 urte artekoekin konparatuta, eta, are gutxiago, 50 urtetik gorakoekin parekatuta.

Sare sozialak, iturri

Gazteen artean askoz ohikoagoa da sare sozialak edo Interneteko bilatzaileak aipatzea informazio iturri gisa: Facebook aipatzen dute %5ek, zortzi herrialdetatik zazpitan. Espainian, Twitter ere aipatzen dute informazio iturri nagusi gisa. Ikerketak ez du argitzen, halere, sare sozialen bidez jasotzen den informazio hori zenbatetan den hedabideen artikuluen aipamenak. Edonola ere, 50 urtetik gorakoek askoz gutxiago aipatzen dituzte sare sozialak edo bilatzaileak. Salbuespena Google da, eta Italian izan da: %5ek aipatu dute han.

Nabarmentzekoa da hedabide publikoek Europako hegoaldeko herrialdeetako gazteen artean galdu duten pisua: Espainian, Frantzian eta Italian, gazteek ez dituzte aipatzen hiru informazio iturri nagusien artean. Pew zentroak 16.114 helduri galdetu zien ikerketa egiteko, iazko udazkenean, eta horietatik 2.970 pertsona 30 urte baino gazteagoak ziren.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Berria Ikasgelaren Tutoriala

BERRIA Ikasgela, egunerokoarekin ikasteko tresna

Mikel P. Ansa

Proiektu berri bat sortu du BERRIA egunkariak: Ikasgela. 12 urtetik aurrerako ikasleekin eskola orduetan lantzeko gaiak proposatuko ditu webgune batean, Berria.eus/ikasgela helbidean. Material osagarria eskainiko dio hezkuntza komunitateari.

Berria Ikasgelaren Tutoriala
 ©MARISOL RAMIREZ / FOKU

«'Kontrol' hitzak adiera ezberdinak ditu armen merkatuaz hitz egitean»

Amaia Ramirez de Okariz Kortabarria

Urteak daramatza Calvok armen salerosketa ikertzen, Delas zentroan. Industria hori kontrolatzea posible den ala ez: galdera hori izango du hizpide Gasteizen bihar emango duen hitzaldian.
HBO Max plataformak gaur estreinatuko du <em>Todo lo otro</em> telesaila; Abril Zamorak sortu du. ©HBO MAX

HBO Max gaurtik martxan da Hego Euskal Herrian, eduki berriekin

Urtzi Urkizu

Plataforman HBO, Max Originals, Warner Bros, DC eta Cartoon Networkeko edukiak daude

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.