Albistea entzun

Alaves 1-1 Eibar

Borroka eta jolasa

Berdindu egin dute Alavesek eta Eibarrek derbi orekatuan. Aurrea hartu dute etxekoek; bikain erantzun, kanpokoek
Darko Brasanac eta Ivan Ramis, lehian, atzo, Mendizorrotzan.
Darko Brasanac eta Ivan Ramis, lehian, atzo, Mendizorrotzan. ADRIAN RUIZ DE HIERRO / EFE Tamaina handiagoan ikusi

Eñaut Agirrebengoa -

2019ko martxoak 10

Golak. 1-0: Inuik (58. min.). 1-1: Marc Cardonak (70. min.). Epailea. Alberola Rojas. Txartel horiak: Alaveseko Adrian Marini; eta Eibarreko Escalanteri. Bestelakoak. 18.793 ikusle Mendizorrotzan.

Denetarik izan zuen atzo Alavesek eta Eibarrek Mendizorrotzan jokatutako derbiak: lehen zatian, borroka eta joko itxia; bigarrengoan, berriz, zirrara eta gola sartzeko aukera oldea; eta, oro har, oreka eta bizitasuna. Partidak lehia fisikoa eskatu zuenean, gehiago izan zen Alaves. Eibar, ordea, hazi egin zen partida ireki eta baloiarekin jolas egiteko tartea izan zuenean. Azkenean, emaitzak bi taldeen arteko parekotasuna islatu zuen: berdinketa.

Bakoitzak bere estiloaren berri eman zuen hasieran. Alavesek zuhur ekin zion lehiari: atzean sartu, eta aurkariaren zain gelditzea erabaki zuen. Hori horrela, Eibarrena izan zen ekimena partidaren hasieran. Eroso sentitu ohi da gidoi horrekin, arerioen zelaian denbora gehien pasatzen duen Lehen Mailako taldea baita. Edonola, atzo ez zuen nahi beste gozatu. Bi taldeek bizitasun handiz borrokatu zituzten baloi guztiak, eta, ondorioz, oso zaila suertatu zen jokaldiak ehuntzea.

Katramila horren erdian, baloiak luze jokatzea deliberatu zuten. Bada, Alaves indartsuago agertu zen goiko jokoan, eta, pixkanaka, bere legea ezartzen hasi zen. Callerik eta Bastonek oxigenoa eman zieten arabarrei, talka ugari irabazi eta arriskua sortuta. Bastonek bi aukera on izan zituen, bata Calleri barruraino sartu ostean (15. minutuan), eta bestea area barruan maisuki mugitu eta jaurtiketa gogorra eginda (38. minutuan). Alabaina, baloia gora bidali zuen lehenik, eta Dimitrovicekin egin zuen topo hurrena. Callerik ere abagune garbi askoa izan zuen 25. minutuan, arean tokia egin ostean; hala ere, kanpora errematatu zuen, dena alde zuela.

Kolpeari kolpea

Etxekoek ahulezia zantzuak antzeman zituzten Eibarren ezker hegalean, eta zuloa ondo ustiatu zuten. Mendilibarrek Joan Jordan ezkerrean kokatu zuen, hau da, hegaleko petorik gabe aritu zen Gipuzkoako taldea, eta horrek ezohiko asimetria eragin zuen. Eskuin hegalean sendo egon zen, eta arriskua sortu zuen handik, areara eginiko erdiraketekin. 20. minutuan, Ruben Peñak erdiratu, eta buruz kanpora jaurti zuen Kike Garciak, eta, hiru minutu geroago, beste horrenbeste egin zuen Charlesek. Alabaina, ezker hegala kamustuta eduki zuten kanpokoek. Oso urriak izan ziren Coteren barneraldiak.

Atsedenetik bueltan, aztoratu egin zen partida. Lehen hamar minutuetan, aurretik jartzeko bizpahiru aukera on izan zituen Alavesek, Baston, Inui eta Calleriren bitartez, eta Eibarrek Jordanen eta Orellanaren ahaleginekin erantzun zuen. Gol giroa zegoen, eta, azkenean, Alavesek jaso zuen saria, korner baten osteko kontraeraso ikusgarrian (57. min). Jonyk arrapaladan gidatu zuen jokaldia, eta pase zehatz batekin apurtu zuen gipuzkoarren azken lerroa. Inuik Dimitrovici ziria sartu, eta baloia emeki bidali zuen sareetara.

Taldeari gola sartu eta berehala, Escalante kendu, eta Cucurella zelairatu zuen Mendilibarrek. Taldeak eskertu egin zuen aldaketa, sakontasuna irabazi baitzuen ezker hegalean. Hori horrela, Eibarrek setiatu egin zituen etxekoak, harik eta 71. minutuan Cardonak partida berdindu zuen arte. Eskuin hegaletik jokaldia eraiki zuten Peñak eta Orellanak, eta txiletarren erdiraketa erremate zehatz eta indartsu batekin aprobetxatu zuen aurrelariak. Kanpokoak ez ziren bertan goxo gelditu, eta erauntsiari jarraipena eman zioten. Alavesek galdua zuen lehen zatiko freskotasuna. Lehiatik kanpo zegoen. Edonola, markagailua ez zen gehiago mugitu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Novack Djokovic 2021eko Roland Garroseko neurketa batean. ©YOAN VALAT, EFE

Txertatu ezean, Djokovicek ezinen du jokatu Roland Garrosen

Uxue Rey Gorraiz

Frantziako Gobernuak atzera egin du. Kirol ministroak iragarri du soilik txertoaren pauta osatua dutenek hartzen ahalko dutela parte kirol jardueretan.

Modric, Real Madrilen lehen gola ospatzen. ©STR / EFE

Ez du hozka egin

Iñaki Berastegi

Athleticek 0-2 galdu du Real Madrilen aurka Superkopako finala, Modricen eta Benzemaren golekin. Madrildarrak nagusi izan badira ere, Athleticek azken txanpan estutu du. Courtois atezainak penalti bat gelditu dio Raul Garciari.

Peña II. pilotari ematear, atzo, Gasteizko Ogeta pilotalekuan, Jaca begira duela. ©Jaizki Fontaneda, FOKU

Peña II.a eta Albisu gailendu dira Binakako Txapelketako bederatzigarren jardunaldian

Berria

Txapelketako laugarren garaipena erdietsi dute Peña II.ak eta Albisuk; hirugarrena dute segidan. Jaka eta Mariezkurrena ez dira fin aritu, huts franko egin dute, eta apenas izan duten lehiari eusteko aukerarik.

Joseba Ezkurdia, atzoko norgehiagokan egindako tantoetako bat ospatzen. ©IÑIGO URIZ / FOKU

Ez dute esan azken hitza

Ainara Arratibel Gascon

Ezkurdia-Tolosak 22-18 irabazi diete Altuna III.a-Martijari. Partida gogorra eta parekatua izan da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.