Baldintzak eta mehatxuak elkarrizketaren ordez

NBEk Yemengo gerra konpontzeko antolatu dituen elkarrizketak bertan behera gelditu dira. Gobernuak gaur arteko epea eman die matxinoei
Gerran hildakoen hilarriak, Sana hiriburuan.
Gerran hildakoen hilarriak, Sana hiriburuan. YAHYA ARHAB / EFE

Mikel Rodriguez -

2018ko irailak 7
Aspalditik iragarria zuen NBE Nazio Batuen Erakundeak Genevako (Suitza) atzoko hitzordua, Yemengo gerraz eztabaidatzeko. «Kontsulta» terminoa erabilia zuen, gobernua eta matxino xiitak ez baitzeuden prest zuzeneko negoziazio formalak hasteko. Ahalegin diplomatiko xumea zenari bultzada berezia eman zion NBEk duela hilabete bat, Saudi Arabiak zuzentzen duen koalizioak 40 adingabe hil ondoren bonbardaketa batean. NBEk «munduko krisi humanitario larriena» izendatuta daukanari konponbide bat bilatzeko itxaropentzat aurkeztu zuen, eta Segurtasun Kontseiluak herenegun bi aldeei erran zien «lehenbiziko pausoa» emateko, baina ezerezean gelditu da ahalegina.

Izan ere, huthien (matxino xiiten) ordezkariak ez ziren Genevara joan atzo, NBEri leporatu baitzioten ez betetzea haiek paratu zituzten baldintzak. Yemengo Gobernuak gaur eguerdira arteko epea eman die agertzeko; bertzela, haren ordezkariak Genevatik joanen dira. Huthiek NBEri eskatu zioten bermatzeko zaurituta dauden milizianoak Omanera eramatea, Omanen sendatu dituztenak bueltatzea, eta Genevara joatekoa zen delegazioa Yemengo Sana hiriburura itzuli ahal izatea. Huthiek Sana eta ipar-mendebalde eta mendebalde gehiena dituzte kontrolpean 2014az geroztik. Gobernua, berriz, hegoaldean ezarrita dago.

NBEko ikerlariekin, haserre

Saudi Arabiak eta harekin bat egin zuten herrialde batzuk 2015eko martxoan hasi ziren Abd Rabo Mansur Hadi presidentearen gobernuaren alde esku hartzen. Joan den astean, NBEren ikerlari batek gerra krimenak egitea leporatu zien gatazkaren bi alde nagusiei, eta zehaztu zuen «dokumentatutako hildako zibil gehienak» koalizio horrek eragin dituela. Mohammed Asker Yemengo Giza Eskubideetarako ministroak ikerlari taldearekin elkarlana bukatzeko mehatxua egin zuen atzo, «neutralak» ez direla leporatuta.

NBEren arabera, 2015az geroztik 6.600 zibil hil dituzte. Huthien eta gobernuaren artekoa da orain gatazka nagusia, baina Yemenek, batu zenetik (1990), ez du bakerik ezagutu, gatazka armatu ezberdinak izan baititu herrialdearen hainbat eremutan. Horren adibide, Hadramout probintzian, Hego Yemenen, independentziaren aldekoak indartsu diren tokian, bi aste daramatzate protesta gogorretan Hadiren gobernuaren aurka egoera ekonomiko larriarengatik, eta, atzo, probintziako gobernadoreak presidenteari erran zion horien eskaerak betetzen ez baditu petrolio esportazioak etengo dituela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna