REALA 2 ATLETICO MADRIL 0

Agindua bete, ginga jartzeko

Realak mendean hartu du Atletico Madril, partida osoan nagusitu ostean. Txuri-urdinek inoizko zale gehien izan dituzte etxeko neurketa batean: 34. 719
<b>Poza.</b> Realeko jokalariak elkarri besarkatuta, lehen gola ospatzen.
Poza. Realeko jokalariak elkarri besarkatuta, lehen gola ospatzen. JUAN CARLOS RUIZ / FOKU Tamaina handiagoan ikusi

Jon Ander De la Hoz -

2019ko irailak 15

Golak. 1-0: Odegaardek (58. min.). 2-0: Monrealek (61. min.) Epailea. Mateu Lahoz. Txartel horiak: Realeko Zubeldiari eta Lorenteri; eta Atleticoko Trippier eta Costari. Bestelakoak. 34.719 ikusle Anoetan.

«Ausart jokatu behar dugu». Hala esan zuen ostiralean Imanol Alguacil Realeko entrenatzaileak, eta txuri-urdinek ondo baino hobeto bete zituzten prestatzailearen esanak. Atletico Madril liderraren bisita jaso zuten atzo Donostian, baina horrek ez zituen jokalariak kikildu: aise nagusitu zitzaizkien. Itxura dotorea eta giro bikaina zituen Anoetak, eta Realak etxeko partida batean inoizko zale gehienen babesa izan zuen. 34.719 jarraitzaile bildu ziren Amarako futbol zelaian.

Aitzakiarik gabeko partida bat jokatu zuten donostiarrek. Hasi eta buka, partida osoan Realaren mende ibili zen Atletico Madril liderra, eta ahal izan zuenean bi gol eginda hiru puntuak eskuratu zituzten Alguacilen jokalariek. Huraxe izan zen Anoetako festak behar zuen ginga.

Mateu Lahoz epaileak partidari hasiera eman zionetik, jokoan gehiago izan zen etxeko taldea. Garaipenaren bidera itzultzeko gosez ziren txuri-urdinak, baina presarik gabe aritu ziren lehendabiziko uneetan. Aurkariari neurria hartzea zuten estreinako egitekoa. Uste baino errazago egin zuten hori.

Indarrak parekatutakoan, zelaian urrats bat aurrera egin zuten donostiarrek. Bisitariak estutu zituzten, eta zuloren bat noiz aurkituko aritu ziren espainiarrak. Alferrik: Realak bazekien zertan ari zen. Baloiaren jabetza izanagatik, lehen zatian Jan Oblaken atea zulatu ezinda iritsi ziren atsedenaldira, baina indarberrituta itzuli ziren bigarren zatian.

Jokoa berriz hasi orduko, Realak erasora egin zuen, eta bi minutuan bi gol aukera izan zituen. Ordurako lehen aldaketa egina zuen Diego Pablo Simeone Atletico Madrilen prestatzaileak, bere taldeari pizgarri bat erantsi nahian. Ez zitzaion ondo atera baina. Aldaketa egin eta hamar minutura iritsi zen txuri-urdinen erauntsia. Ezker hegaletik egindako jokaldi batean Martin Odegaardi iritsi zitzaion baloia, eta norvegiarrak ez zuen barkatu. Hotz jokatu, eta bi aurkariri izkin egin zien espainiarren arean, baloia sareetara botatzeko. Hark zabaldu zuen garaipenerako bidea, eta hurrengo minutuetan itxura ona berretsi besterik ez zuten egin etxekoek.

Bi minutu geroago, errenta hori handiagotu egin zuen Anoetan debutari zen beste batek. Baloia Atletico Madrilen arean zegoela, eta Oblakem aldaratze kaskar baten ondoren, Natxo Monrealek, adi, ez zuen barkatu. Bi goleko abantailarekin jarri zuen Reala, eta bazirudien hiru puntuek ez zutela ihes egingo.

Imanol Alguacil gustura geratu zen ezker hegaleko atzelariak eman zuen itxurarekin: «Sendotasuna eman digu, berak, eta talde guztiak». Hain justu, zelaian aritu ziren guztiak goraipatu zituen Oriokoak: «Hitzik gabe nago. Oso ondo gaude guztiok, badakigu zertara jokatzen dugun. Horrela jarraitzen badugu, denentzat aukerak izango ditugu. Jarrera hau lortu behar dugu, batik bat, egunerokoan».

Analisi horrekin bat egin zuen Simeonek ere: «Realak eskertuko du zelai berria, futbola beste era batera bizi dute zaleek». Atleticoko prestatzaileak nabarmendu zuen jokoan «gehiago» izan zela Reala.

Txuri-urdinek ez zuten amorerik eman hurrengo minutuetan, eta, partidaren gidari izan baziren ere, Atletico Madril ordura arte egin ez zituenak egiten saiatu zen neurketaren hondarrean. Azken hamar minutuetan izan zuen lan gehien Miguel Angel Moya atezainak. Bisitariak saiatu ziren ezker hegaletik min egiten, eta birritan gola egitetik gertu geratu ziren. Moyak gelditu zituen bi saiakerak.

Bisitarien lehen porrota

Ordutik, eta partida amaitu zenera arte kontraerasora emana aritu zen Reala. Ordurako zuen aldea areagotzea beste xederik gabe zegoen, festarako baitzeuden ordurako zaleak. Eskura zuten garaipena, eta zazpi minutuko luzapenak ez zien kendu.

Bisitarien lehen porrota izan zen atzokoa. Ligako lehen hiru partidak irabazita heldu zen Atletico Madril Donostiara, baina Realak ez zion laugarrena eskuratzeko aukerarik txikiena ere utzi. Imanol Alguacilek bazekien handia egin zutela: «Gehienetan, partida amaitu bezain pronto aldageletarako bidea hartzen dut. Oraingoan, zelaian geratu naiz gozatzen».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Teresa Errandonea, maskara jantzita entrenatzen, Donostiako belodromoan. ©JON URBE / FOKU

Entrenatu ere, maskararekin

Ainara Arratibel Gascon

Atletek maskara jantzita izan behar dute entrenatzeko. Ivan Fernandezek eta Teresa Errandoneak diote errespetatzen duten arren zaildu egiten diela beraien prestaketa.

 ©LEOBIANCA PHOTOGRAPHY

«Akatsik ezin da egin Real Madrili irabazi nahi bazaio»

Iñigo Lasa

Alaves eta Real Madrilen arteko partida «polita» eta «lehiatua» izatea espero du Ivan Campok. Bi taldeetan jokatutakoa da, bere ibilbideko bi fase ezberdinetan.
Elordi eta Arteaga pilota aukeraketaren egunean. ©JON URBE / FOKU

Hazten segitu ahal izateko txapela

Ainara Arratibel Gasconb

Bigarren Mailako buruz buruko finala jokatuko dute gaur Arteagak eta Elordik. Bi pilotariak «gogotsu» daude gaurko norgehiagokarako

Joseba Zaldua, baloi bat lehiatuz. Atzelari donostiarrak bere lehendabiziko partida jokatu du aurtengo Europa ligan. ©OLAF KRAAK / EFE.

Kilimarik egin gabe

Jon Ander De la Hoz

Reala lotuta aritu da AZ Alkmaarren zelaian, eta puntu bat zakuratuta itzuli da Donostiara. Txuri-urdinek bizirik segitzen dute Europa ligan, zazpi punturekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.