Galdu ezinezko abagune bat

Realak Huesca azken sailkatua jasoko du gaur, Anoetan. Moyak min hartu du, eta deialditik kanpo geratu da; zerrendara itzuli da Zurutuza
Imanol Alguacil entrenamendu bat zuzentzen, Zubietan.
Imanol Alguacil entrenamendu bat zuzentzen, Zubietan. JUAN HERRERO / EFE

Jon Ander De la Hoz -

2019ko urtarrilak 27
Zoro dabil Espainiako Liga. Puntu bakoitzak garrantzi handia du sailkapenari begira, aitaren batean helburuetara urrundu edo gerturatzeko ahalmena baitu, eta urre gorriaren pare ordaintzen dira hiru puntuak. Urte hasiera onari eutsi eta aurtengo hirugarren garaipena eskuratu nahi du Realak Huescaren aurka. Sailkapenaren zuloan daude espainiarrak, 11 punturekin, eta zazpi ateratzen dizkio Vila-real azken-aurrekoak. Donostiarrak, aldiz, goiko postuei begira jarriak daude, eta haien bila joateko abagune ezin hobea da gaurko neurketa. Alabaina, tentuz ibiltzeko ohartarazi zuen Imanol Alguacil txuri-urdinen entrenatzaileak: herenegungo prentsa agerraldian: «Ahaztu egin behar dugu azken sailkatuaz. Partida garrantzitsu bat gehiago da, gauza asko ondo egiten dituen talde baten aurka».

Alguacilek bost partida daramatza txuri-urdinen aulkian, eta oraindik ez du partidarik galdu: «Balio handia ematen diot bolada on horri. Talde bat sortzeko denbora behar da, eta horretan gabiltza. Beti da hobea irabaziz hazten joatea, eta aldagela eskuzabala aurkitu dut. Gauza asko ditugu hobetzeko, baina hautsi dugu bolada txarra».

Prestatzaile oriotarrak ezingo du Miguel Angel Moya atean kokatu, min hartu baitzuen atzoko entrenamenduan. Alabaina, David Zurutuza osatu da, eta deialdian sartu du Alguacilek. Erdilariak asteak zeramatzan zelaietatik kanpo. Halaber, Mikel Merinok ere taldeari laguntzeko aukera izango du, zigorra bete ostean.

REALA-HUESCA

Reala. Rulli; Zaldua, Navas, H. Moreno, Aihen Muñoz; Illarramendi, Merino, Zubeldia; Oiartzabal, Januzaj eta Willian Jose.

Huesca. Santamaria; Miramon, Insua, Etxeita, Pulido; Herrera, Rivera, Moi Gomez; Cucho, Enric Gallego, eta Ferreiro.

Epailea. Prieto Iglesias.

Lekua. Anoeta (29.000 ikusle).

Ordua. 18:30ean (Bein La Liga).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna