Zehaztuta dago dena

Artola-Mariezkurrenak 22-21 galdu dute Ezkurdia-Ladis Galarzaren aurka, eta, beraz, Altuna III.a-Martija sailkatu dira finalerdietarako
Iñaki Artola, pilota eraman nahian, atzo, Labriten.
Iñaki Artola, pilota eraman nahian, atzo, Labriten. JAGOBA MANTEROLA / FOKU

Julen Etxeberria -

2019ko otsailak 24
Kito. Zehaztuta daude kontu guztiak Binakako Txapelketako aurreneko ligaxkan. Partida bat falta da jokatzeko, Altuna III.a-Martijak eta Bengoetxea VI.a-Imazek gaur Donostian jokatuko dutena. Baina sobera dago norgehiagoka hori. Jakina da jada zein lau bikote ariko diren finalerdietako ligaxkan: Aspetik, Elezkano II.a-Rezusta, Irribarria-Zabaleta eta Altuna III.a-Martija; eta Baikotik, Victor-Albisu. Bi aste barru hasiko da bigarren ligaxka.

Altuna III.a-Martija edo Artola-Marizkurrena sailkatuko ziren. Horra azken jardunaldian argitu beharreko kontu bakarra. Bada, aurrenekoentzat izan da saria, azken partida jokatu gabe. Aukera bakarra zegoen hori gerta zedin, Artola-Mariezkurrenak Iruñean Ezkurdia-Ladis Galarzaren aurka galtzea. Eta horixe gertatu zen: Ezkurdia-Ladis Galarzak 22-21 irabazi zuten, eta mesede galanta egin zieten enpresakideei. Emaitza horrek baliorik gabe utzi zituen gaurko partida eta atzo Irribarria-Zabaletak Victor-Albisuren aurka Ataunen jokatutakoa: 22-18 irabazi zuten Aspekoek.

Emozioak gainezka egin zuen Labriten, tanto bakar batek erabaki baitzuen garaipena eta zeinek egin aurrera. Azken tanto hori, gainera, ezin luzeagoa eta borrokatuagoa izan zen. Baina Ezkurdiak zapuztu zituen Baikoen itxaropen guztiak.

Atzelarien partida izan zen, aurrelariak eskas aritu baitziren: Ezkurdiak zazpi tanto egin zituen, eta sei huts egin; Artolak, berriz, hamar egin zituen, eta beste horrenbeste huts egin. Atzean, ordea, oso ondo aritu ziren Ladis Galarza zein Mariezkurrena, batez ere bigarrena. Berriozartarrak erakustaldia eman zuen bigarren erdian, 15-10 atzetik zirenean, eta berriro utzi zuen agerian atzelari puska dela, eta 19 urterekin, etorkizun bikaina duela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Julen Etxeberria

Informazio osagarria

S: