Albistea entzun

«Gero eta gehiago gara»

Milaka pertsona bildu ditu Zubietako errauste plantako obrak gelditzeko eskaerak, Donostian
Milaka lagunek parte hartu zuten Zubietako erraustegiaren kontrako protestan. Argazkian, Bulebarrean.
Milaka lagunek parte hartu zuten Zubietako erraustegiaren kontrako protestan. Argazkian, Bulebarrean. J. C. RUIZ / FOKU Tamaina handiagoan ikusi

Maite Asensio Lozano -

2018ko urriak 28 - Donostia

Asko, eta askotarikoak. Protesta jendetsua egin nahi zuten, lanen bigarren fasea jada abian den arren, oraindik lor daitekeela irudikatzeko: indarra. Eta hainbat esparrutako jendea erakarri nahi zuten, aldarriak sektore ugari batzen dituela erakusteko: aniztasuna. Eta, azkenean, asko eta askotarikoak izan ziren: hamabost eragilek deituta, milaka lagunek berretsi zuten atzo Zubietako errauste plantaren aurkako jarrera, Donostian egindako manifestazioan. «Gero eta gehiago gara. Gero eta gehiagok eskatzen dugu erraustegiaren obrak gelditzeko eta kontratua eteteko».

Aspaldiko partez berokiak armairutik aterata eta aterkiz hornituta iritsi ziren martxako parte hartzaileak Ehunurteurrenaren plazara; euria, haizea eta hotza aurreikusita zeuden, baina ordaina jaso zuten eguraldi albisteen gainetik deialdiari erantzun zioten herritarrek: tantarik ez zen erori manifestazioak iraun bitartean. Antolatzaileen arabera, 10.000 pertsonak parte hartu zuten. Jendetza izan zen kaleetan: adibidez, 25 minutu igaro ziren Easo plazan lehen pankarta sartu zenetik azken manifestaria atera zen arte, eta Askatasunaren hiribidea ere alderik alde hartu zuen martxak.

Hiru pankartak ireki zuten bidea, elkarren jarraian. Erraustegia gelditu! leloa zeraman lehenak; Badago alternatiba! esaldiaren bidez, sindikatuen eta lan eremuko eragileen mezua bildu zuen bigarrenak; Ekonomia zirkularra ez da errausketa zioen hirugarrenak. Haien atzetik, herritarrak, eta, tarteka, aldarriak. Manifestazioa Bulebarrera heldu zenean ozendu ziren oihuak: «Erraustegirik ez, ez Zubietan ez inon». Gipuzkoako ahaldun nagusi Markel Olanori ere igorri zioten mezua: «Olano, entzun herriak zer nahi dun». Alderdi Ederren amaitu zen martxa; oraindik Bulebarrean zeudenen aldarriak entzuten zirela abiatu zuten manifestazio bukaerako ekitaldia.

Argudioak, aletuta

Asko eta askotarikoak dira, era berean, Zubietako planta geratzeko arrazoiak, protestaren antolatzaileen ustez. Oholtzara igo ziren deitzaileak, banaka, argudio horiek aletzera. Plantaren kontratuak iraungo duen 35 urteetan Gipuzkoako udalak «zorpetu» egingo direla nabarmendu zuen Erraustegiaren Aurkako Mugimenduak: «Eta herritarrontzat oinarrizkoak diren zerbitzu publikoak eskastu eta murriztuko dira». Parte hartzea aldarrikatu zuen GuraSOSek: «Gipuzkoa osasungarriago eta demokratikoago bat lortzeko garaiz gaude». Errausketa «osasunerako arriskutsua» dela ohartarazi zuen OEIT mediku taldeak. «Diru publikoaren pribatizazioa» gaitzetsi zuten sindikatuek. «Bizitzak kutsatzen» dituzten proiektu «txikitzaileen» aurka agertu zen Ernai. Eta hondakinak kudeatzeko beste aukera arduratsuago eta iraunkorragoak badaudela azpimarratu zuen Greenpeacek: «Hobeak dira ikuspegi ekonomikotik, eta ingurumenaren eta osasunaren ikuspegitik ere».

Gipuzkoa Zutik mugimenduak, gainera, gogoan hartu zituen Ainhoa Intxaurrandieta eta Iñaki Errazkin GHK-ko arduradun ohiak: «Herritarrontzat kaltegarria den erraustegi bat gelditzea ez da inoiz delitua izango». Partzuergoak bihar ebatziko du Intxaurrandietaren eta Errazkinen aldeko epaiari helegitea jarri ala ez.

Itxaropen mezua ere eman zuten deitzaileek. Gogora ekarri zuten errausketa indarra galtzen ari dela hainbat herrialdetan, eta proiektu zenbait geldiarazi dituztela azken hilabeteetan: Valdemingomezko planta (Madril) itxi egingo dute, Txinan hiru egitasmo geldiarazi dituzte protestek, Mexiko Hiriak uko egin dio erraustegia eraikitzeari... «Lorpen gehiago etorriko dira». Lanean jarraitzeko deiarekin amaitu zuten ekitaldia: «Guk ere lortuko dugu: hemen ere posible da, eta oraindik garaiz gaude. Aukera ditzagun hondakinen arazoa konpontzeko beste bide batzuk. Jar ditzagun abian osasuna, ingurumena eta herritarren interesak lehenesten dituzten alternatibak».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Martin Villa, iazko irailaren 3an Servini epailaren aurrean deklaratu ostean, auto barruan. ©JUANJO MARTIN / EFE

Martin Villa, Servinik auzipetua

Arantxa Iraola

Auto batean auzipetu du 1976ko Gasteizko hilketengatik eta German Rodriguezenarengatik

Suhiltzaileak lanean, Gasteizen, artxiboko irudi batean. ©Endika Portillo / Foku

Gizon bat hil da Donostian, taberna batean piztutako sute batean

Berria

Gros auzoko Gure Txoko tabernako sukaldean piztu da sua, goizeko 9:00ak aldera. Taberna itxita zegoen.

Kongresuko hitzaldietako bat, atzo, Hernanin. ©GORKA RUBIO / FOKU

Demokrazia Komunalaren Aldeko Nazioarteko Sarea aurkeztu dute

Jone Arruabarrena

«Kapitalaren logikarekin eta zapalkuntza modu guztiak» amaitzeko erez aritu dira, Hernanin

Nekane Lekuona. / ©Andoni Canellada, Foku

Minbiziaren ondorioak samurtu nahian umeei

Maria Ortega Zubiate - Gipuzkoako Hitza

Aspanogi elkarteak eskatu berri du protokolo bat ezar dezatela minbizia gainditu duten haurrei jarraipena egiteko. Gaixotasuna gainditu duten haurren %70ek jasaten dituzte ondorioak gerora.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna