Azken aukera

Belaunaldi berriko hamabortz bat gaztek beren gain hartu dute EHZren gidaritza taldea. Martxo arte dute proiektu bat plantan jartzeko
Lekorneko Garroa jauregian bildu ziren EHZkoak, asteburuan.
Lekorneko Garroa jauregian bildu ziren EHZkoak, asteburuan. BOB EDME

Nora Arbelbide Lete -

2018ko irailak 25
Baliteke ez jaialdi bat izatea. Baliteke jaialdi bat izatea. Segur dena da EHZren aterkipean lanean segitzeko nahia erakutsi duela belaunaldi gazte berriak. Hortik at, «dena irekia da», abisatu dute Leire Fagoaga, Hegoa Baños Olabarri Urruti eta Ximun Boscqek. Hirurak EHZko gidaritza taldea berrian sartuak dira. Hamabortz bat gazte dira orotara taldean. Bana bertze 22 urte dituzte, alde guztietatik datoz, Hendaiatik Zalgizeraino, eta horien artean nehor ez da egon jaialdiko ardura postuetan. Orain arte egin izan diren gogoeta eta diagnostiketan ez dute parte hartu. Proiektu landuak izan direnak. Irakurriko dituztela azaldu dute, baina ez dute deus hobetsirik oraingoz.

Mementoko ostegunero hasi dira biltzen, Itsasun, laguntzaile batek prestatzen dien bere etxeko gela batean. Hortaz, alokairurik ez dute ordaintzerik. EHZk berak zorrak kitatuak ditu. Gehiago dena, diru bat ere badago jaialdiaren kutxan. Izpiritua libre alde horretatik. Arrazoi bat gehiago «hutsetik» hasteko. Nahiz eta jakin, eta «eskertu» ere, belaunaldi zaharra hor ukanen dutela sosegu, edozein laguntza emateko prest. Orain bereziki berantetsia dutena da elkartzea eta eztabaidak hastea. Martxora arte dute zerbaiten proposatzeko. Bitartean, «presiorik gabe» ari direla esan dute.

EHZk badituela balioak eta horiekin segitzeko asmoa dutela diote gazteek. Haiek ikusten dituzten balioak, hauexek: «Elkarlaguntza, elkarzaintza, elkartasuna. Toki ezberdinetako gazteen arteko trukatzea bat izatea. Alternatiba bat sortzea, eta beste mundu utopiko bat». Hortik abiatu, eta gaur egungo gazteen beharrei erantzutea dute xede. Baina hori ez dakite zuzen zein formatutan.

Bizkitartean, talde berri hau sortzen ikusi duen irailaren 15eko EHZren biltzar nagusia gazteek berek nola bizi izan duten azaltzeak balio dezake ikusteko nondik datozen. Hil edo biziko biltzar nagusi bezala aurkeztua zuen hitzordua jaialdiak. Elkartearen likidazioa bai ala ez, hori zuten erabakitzekoa.

Kontua da EHZ jaialdiak azken urte hauetan ez dituela urte errazak izan. Dela ekaitza, edo hobeki errateko, ekaitzak, dela diru galtzeak edo beste. Bada bulta bat gogoetatik gogoetara ari direla jaialdikoak, zer egin, zertarako. Batzuetan asmatzen, besteetan ez hainbeste. Bazen horrelako giro bat biltzar nagusi hartan, justuki, non jende anitz «errea», «asea» ikusi baitzuen belaunaldi berri horrek. «Gazte gisa, hastapen bezala ez zuen gogoa ematen halabeharrez». Gau hartan ez zuen eman izena Banos Olabarrik. Baina biharamunean berean eman zuen: «Hasten zara pentsatzen, azkenean, ez baduzu zuk ematen, nork emanen du? Behar da belaunaldi berri bat, ez dena errea. Zaflako bat bildu dut gau hartan, eta orain zinez gogotsu naiz. EHZ zinez bikaina baita. Segur dena da izugarriko ondarea dela EHZ».

Eta Baños Olabarri Urruti bezala, lagunen artean motibatu ziren laster. «Gogoa dugu», argi utzi nahi du Fagoagak: «Ez dugu egiten nahiaren kontra». Fagoaga bera oraino motibatuagoa atera da osteguneko lehen lan bilkuratik. Ikusiz beste jende andana bat ere bazegoela.

Ilusioz beterik dira hiru gazte hauek. «Biziki positiboa dena da denak garela berriak, motibatuak. Ea zer emanen duen. Baina, ene ustez, aski baikorra da. Arnas berri bat emateko balioko du. Gero, beharbada 2019an ez da deus izanen. Entseatzen gara».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna