«Espero dugu Osasun Batzordean legea hobetu ahal izatea»

DHE Duin Hiltzeko Eskubidea elkarteko EAEko ordezkaritzako lehendakari Concha Castellsek espero du PSOEk aurkeztutako lege proposamen hau aurrera ateratzea, baina hobetuta. Elkarteko ordezkariak beti izan dira kritikoak legearen puntu batekin: ez zaie ongi iruditzen eutanasia eskari bakoitzak, medikuen oniritziaz harago, kontrol eta ebaluazio batzorde baten aldeko ebazpena ere jaso behar izatea. Batzorde horiek autonomia erkidegoka eratzea da asmoa, eta toki bakoitzeko «lerrotze ideologikoaren» arabera, uste dute legeari «boikot egiteko» tresnak izan daitezkeela: «Arriskutsua da; ekar dezake turismo eutanasikoa ere: eutanasia egin ahal izateko, erkidego batetik bestera joatea».

Hauspotu egin nahi duzue berriz testuaren gaineko kritika hori...

Bai, izan ere, horrek lehengoan jarraitzen du, eta lege proposamena berriz hain azkar atera izana, gainera, gure aurka dator; izan ere, pentsatzen genuen aurrez PSOErekin negoziatu ahal izango genuela kontu hori... Baina, tira, Osasun Batzordera eramango dute orain proposamena, eta espero dugu han hobetzea. Izan ere, bai: guztiz kontra gaude. Inguruko arloko legerietan ez dago antzeko batzorderik; halakoak badira, baina kasuak egin eta gero aztertzeko, eta irregulartasunik izan den ikusteko. Baina aurrez kasuak aztertuko dituen batzorde bat? Eten ere egiten du horrek medikuaren eta pazientearen arteko harremana; tartean sar daiteke. Guretzat paziente batek eske bat egiten badu, handik hamabost egunera berritzen badu, medikuak egokitzat jotzen badu, eta ondoren beste sendagile batek hori bera berresten badu, horrekin aski da. Horrez aparte batzorde bat ipintzea zentzugabekeria bat iruditzen zaigu guri, baina uste dugu oraindik aldatzeko garaiz gaudela; badugu itxaropena. Ez dela lortzen? Bada, gutxienez ere aurrera dagoenarekin: horrenbeste denbora daramagu lege baten zain!

Zer-nolako jarrerak espero dituzue izango den eztabaidan?

PSOEri guk esan diogu aurreko kontrol hori kentzeko, baina uzkur ikusi dugu. Uste dute, era horretan, berme handiagoz jarduteko era emango duela legeak: profesionalak ere seguruago sentituko direla. Podemosek aurrez aurkeztu zuen beste proposamen bat; ez zuen traba hori.

Bermeak indartzeko bestelako neurriak badirela diozue zuek...

Guk, adibidez, ongi ikusiko genuke batzorde bat egotea aholkuetarako: alegia, profesionalen batek kasuren baten inguruan dudak baditu, bertara jotzeko era izateko. Eta bermeak indartzeko gauza gehiago ere egin daitezke. Adibidez, erizainak ere erabakia hartzeko prozesura hurbiltzea lagungarria litzateke: pazienteak ondo ezagutzen dituzte haiek, usu medikuek baino hobeto. Beraz, berme gehiago ezar daitezke.

Kontzientzia eragozle izateko era ematen du testuak. Oztopo izan daiteke legeak garatzeko?

Osasun kudeatzaileek baliabideak jarri beharko dituzte, legea onartzen bada, gauzatu ahal izateko. Mediku elkargoetan egindako inkestek erakusten dute, gainera, profesional gehienak daudela eutanasia arautzearen alde; %30ek-edo esaten dute eragozle egingo liratekeela. Alde horretatik, ez luke eragozpenik egon behar.

Eskuina muturreko jarreretan gotortuta dago, eta saiatuko da zarata egiten legearen aurka. Traba handia izango da?

Seguru, eta, giro horretan, zailagoa da horrenbeste berme ezarri beharko ez dituen lege bat lortzea. Tira, ez da eskuin muturra bakarrik; Apezpikuen Konferentzia ere gai honetaz ari da. Asaldatu egiten dira halakoekin. Eskubide zibil berri bat aipatzen diren aldiro, asaldatu egiten dira.