Olympique Lyon 4-1 Bartzelona

Seigarrena, oso erraz

Olympique Lyonek laugarrenez jarraian irabazi du Txapeldunen Liga. Lehen ordu erdian lau gol sartu ditu, horietatik hiru Hegerbergek
Olympique Lyoneko jokalariak eta entrenatzaileak, titulua ospatzen, atzo, Budapesten.
Olympique Lyoneko jokalariak eta entrenatzaileak, titulua ospatzen, atzo, Budapesten. BERRIA

Ainara Arratibel Gascon -

2019ko maiatzak 19
Olympique Lyon. Bouhhadi; Bronze, Renard, M'Bock, Majri; Fishlock (Kumagai, 72. min.), Henry, Marozsan, Van de Sanden (Cascarino, 63. min.); Hegerberg eta Le Sommer (Bacha, 82. min).

Bartzelona. Paños; Torrejon, Pereira, (Van der Gragt, 81. min.), Maria Leon, Ouahabi; Losada, Bonmati (Alves, 69. min.), Alexia Putellas, Caldentey; Martens eta Duggan (Oshoala, 69. min.).

Golak. 1-0. Marozsanek (5. min.); 2-0. Hegerbergek (14. min.). 3-0. Hegerbergek (20. min.). 4-0. Hegerbergek (30. min.). 4-1. Oshoalak (89. min.)

Epailea. Anastasia Pustovoitova (Errusia). Txartel horiak: Olympique Lyoneko Hegerbergik eta Renardi.

Bestelakoak. 19.487 ikusle bildu dira Budapesteko Ferencvaros estadioan.

Europako talderik onena dela berretsi du beste sasoi batez Olympique Lyonek; Ada Hegerbergek, berriz, aurrelari onena dela. Frantziako taldeak laugarrenez erreskadan irabazi du Txapeldunen Liga, seigarrenez bere historian. Hala, bere nagusitasuna areagotu du, atzo Bartzelonari 4-1 irabazi eta gero.

Partidako izarra Hegerberg izan da, hiru gol sartu baitzituen hamabost minutuan, arean parekorik ez duela erakutsiz. Norvegiako aurrelariak uko egin dio hemendik hiru astera Frantzian jokatuko den Munduko Kopan parte hartzeari, gizonezkoen soldatak askoz handiagoak direla salatzeko, eta, Txapeldunen Ligako finalaren agertokian, urrezko baloiak ez zuen aukera galdu nahi izan duen maila erakusteko.

Aurreko hiru finalak sufrituz irabazi zituen Frantziako taldeak: 2016koa eta 2017koa, penaltietan, eta iazkoa, luzapenean. Oraingo honetan, ordea, ezusterako aukerarik ez zuen eman. Lehen ordu erdian lau gol sartu zituen, eta guztiz erabakita utzi zuen finala.

Historia gutxi izan zuen partidak. Bartzelonak lehen finala jokatzeko ilusioa zuen, baina esperientzia falta ordaindu zuen. Lehia hasi eta berehala, aurretik jartzear egon zen, baina Dugganek gurutzatuegi errematatu zuen Caldenteyk bidalitako pase sakona, laugarren minutuan.

Lyonen aurrean barkatzen duenak ordaindu egin ohi du, eta Bartzelonak ederki egiaztatu zuen, hurrengo jokaldian kolpea jasotzen baitzuen. Van de Sande ondo sartu zen eskuinetik, eta Marozsanek ederki aprobetxatu zuen haren erdiraketa (5. min).

Hortik aurrera, Lyonek, azeleragailua zapaldu, eta arrabola jarri zuen martxan. Aukera bat bestearen antzetik sortzen hasi zen, bere abiadura eta nagusitasun fiskoa baliatuz. Bartzelona erabat gaindituta egon zen. Marozsan eta Van de Sanden behin eta berriz sartu ziren hegaletatik, eta haiek egindako erdiraketak ederki baliatu zituen Hegerbergek. 15. eta 30. minutuen artean sartu zuen hat trick-a. Partidan egin zituen lehen lau jaurtiketetatik hiru sarera joan ziren. Frantziarren lau golak oso antzekoak izan ziren. Bartzelonak lehen zatian egin zuen beste aukera bakarra korner batean izan zen; Putellasek, ordea, gora bidali zuen burukada.

Bartzelonaren gola

Bigarren zatian, Bartzelona ahalegindu zen gutxienez gol bat sartzen. Baina atzean ere talde ahaltsua dela erakutsi zuen Lyonek. Renard eta M'Bock erdiko bi atzelariak gaindiezinak izan ziren Martensentzat eta Dugganentzat. Gainera, lortu zutenean ez ziren fin aritu Bouhhadi atezainaren aurrean. Hala gertatu zitzaion Martensi. 68. minutuan, aukerako baloia izan zuen arean, baina errematea kanpora bidali zuen.

Oshoala zelairatu zuen orduan Lluis Cortesek, eta hark lortu zuen kataluniarren ohorezko gola, partidaren hondarrean. Merezita, bigarren zati horretan Lyonek apenas sortu baitzuen aukerarik, Le Sommerren eta Cascarinoren pare bat ahalegin izan ezik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna