Sanferminak atzo abiatu ziren,baina gaur dute egun handia. Nahiz eta nagusiki zubi gainekoak pizten duen arreta, ezpata dantzarien jarduna askoz ere luzeagoa izaten da. 08:30ean abiatuko da ezpata dantzarien zeregina, meza isilarekin. Ondoren, udalbatza lagunduko dute meza nagusira, baita prozesioan ere. Makilekin gurutzeak eginez ibiliko dira herriko karriketan barrena.
Ibilaldi horien ondotik, zubi gainekoa eginen dute Onin ibaiaren inguruan, eta herriko bandera zubian dantzatu. Gutxi gorabehera 13:00etan izaten da ekitaldi hori. Zeharkakoa ere dantzatuko dute, baina Plaza Zaharrean. Bi aldiz: zubigainekoaren aurretik, eta ondoren. Bazkalondoan ere bada zer eginik: Zantzomonona eginen dute plazaren inguruan, eta, bukatzeko, esku dantza, aurreskua, jota eta porrusalda.
Aurten, bost dantzari berri sartuko dira taldean, beteranoek utzitako tokia betetzera; tartean, hiru emakumeak. Hauek izanen dira dantzariak: Unai Gurrutxaga, Igor Gurrutxaga, Fernando Etxegarai, Martin Etxegarai, Mikel Arriola, Andoni Arriola, Xabier Arriola, Bittor Etxabide, Jon Erro, Alaitz Etxabide, Maddi Taberna, Mikel Maia, Xuban Larretxea, Fred Ramos eta Leire Pastor.
Zubigainekoa
Gaur, 13:00etan, Lesakan(Nafarroa).
