JIRA

Hiztun ona

Angel Erro -

2018ko uztailak 1
Beldurra diet, beldur salatzailea, hiztun onei. Hitz edo esapide baten nolakoa hiztegian inoiz kontsultatzen ez dutenei. Hiztegiari begi bazterraz begiratzen diotenei, erdeinuz. Ez hainbeste zerbait segurtasunez adierazten dutenean. Batez ere zerbait segurtasunez gezurtatzen dutenean baizik. Hori gaizki esanda dagoela, erdarakada dela, euskaraz inoiz esan ez dela ziurtatzen dizute, belarrira gaizki jotzen dielako aitzakian, hizkuntza oso bati beren bizialdiko eta eskualdeko eskarmentuaren neurrira ekarri nahian. Beldurra diet hiztun onei gutxitan erreparatzen diotelako edukiari, gutxitan galtzen dutelako denbora zer esaten duzun. Erantzunen dizutenean solasa jendeztatu ohi dute, entzuleei beren burua ere gehituta.

Miresmena diet, miresmen salatzailea, hiztun onei, behin aurreko paragrafoko afruntuak alde batera uzten ditudanean, besteak beste, afruntu hitza zertan erabili ez dutelako. Sintaxiko ateraldi batek maitemin nazake, maitasunean bezala maitagarri gertatzen delako, bestearengan ulertu bai, baina zuregandik berez inoiz sortuko ez zena.

Baina, oro har, zertarako engaina, beldur gehiago diet, miresmena baino, hori horrela ongi esana balego zuetako bakoitzaren herrian.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna