Albistea entzun

Koronabirusa

Autodiagnostikorako testak, salgai arrakastatsua

COVID-19a norberak diagnostikatzeko testek astebete daramate eskuragarri Hegoaldean. Hala ere, erosleek zailtasun handiak izan dituzte test horiek aurkitzeko, berehala bukatzen baitira botiketan. BIDEOA albistearen barruan.

Autodiagnostikorako test bat, Donostiako Egia auzoko Mendiaraz farmazian.
Autodiagnostikorako test bat, Donostiako Egia auzoko Mendiaraz farmazian. BERRIA Tamaina handiagoan ikusi

Beñat Mujika Telleria -

2021eko uztailak 30 - Donostia

Bada astebete, Espainiako Ministroen Kontseiluak oniritzia eman eta gero, COVID-19aren autodiagnostikoa egiteko testak Hegoaldean lehenengoz salgai jarri zirela. Horregatik, Lierni Mendiaraz farmazialariak eta Miguel Angel Gastelurrutia Gipuzkoako Farmazialarien Kolegioko zuzendariak orain arteko balorazioa eta test horien nondik norakoak adierazi nahi izan dituzte. Biak bat datoz autodiagnostikorako test horiek jaso duten harrera «oso ona» izan dela. Hala ere, bien iritziz, neurri hori «berandu» iritsi da, eta «positiboentzako protokolo argirik» ez da oraindik.

Egia auzoko Mendiaraz Farmazian egiten du lan Lierni Mendiarazek, Donostian. Izurriak hartu duen bidea dela-eta, sinistuta dago test horiek lagungarri izango direla pandemiari aurre egiteko: «Batez ere, osasun zentroak gainezka dauden honetan». Farmazialariaren hitzetan, testak «berehala» bukatzen dira: «bosgarren olatuagatik edo udako oporrengatik», baina jendeak zailtasunak ditu testok aurkitzeko orduan. «Guk ere ezin ditugu nahi bezainbesteko eskaerak egin. Ez genuen espero hainbesteko eskaririk». Marka askotako testak daude, eta farmazia bakoitzak bere prezioa jartzen du. Azpimarratu du Europako Batasunak «gutxienez %97ko espezifikotasuna eta %90eko sentsibilitatea» duten testak erabiltzea gomendatzen duela.

Galdera ugari

Mendiarazen arabera, farmaziara doazen erosleek asko galdetzen dute testen inguruan: «Batez ere, proba nola egin behar den eta positibo emanez gero nola jokatu behar duten jakiteko». Testa egitea «erraza» dela esan du. Makilatxoa sudurreko bi zuloetan sartu behar da; «ez gehiegi, bizpahiru zentimetro». Ondoren likidoa dagoen hodi batean sartu behar da lagina, eta bertan ondo nahastu. Nahasketaren tanta bat bota behar da plaka batean, «haurdunaldiko test bat izango balitz bezala», eta 15-30 minutuan emaitza ematen du: «Marra gorri bakarra emaitza negatiboa denean; bi marra positiboa denean». Testokin, ordea, positibo edo negatibo faltsuak ager daitezke.

Oraingoz, ez dago erarik teston emaitzak zuzenean Osakidetzari jakinarazteko. Miguel Angel Gastelurrutia Gipuzkoako Farmazialarien Kolegioko zuzendaria da, eta azpimarratu du beraiek eskua luzatu diotela Eusko Jaurlaritzako Osasun Sailari: «Etengabe eskatu diogu aukera eman diezagula test horiek egiteko eta horrela guk emaitzak Osakidetzari zuzenean jakinarazteko. Nafarroan horrela egiten da, eta gustatzen zaigu eredua». Azken orduko aldaketa bat egon dela adierazi du: «Orain arte, positibo eman dutenek osasun zentroetara deituz jakinarazi behar zuten. Orain, ordea, Osasun Sailak esteka bat jarri du erabiltzaileen eskura, positiboek datuak sartu eta jakinarazteko».

Gastelurrutiarentzat, testok baliagarriak dira, «azalpenei jaramon eginez gero»: izan ere, akatsak detektatu izan dituzte testak egiteko moduetan. «Eta arazo bat da, halaber, ezin dugula kontrolatu positiboak Osakidetzari jakinaraztea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Migrante batzuk, Irungo Harrera Sarekoen azalpenak entzuten, atzo, herriko plazan. ©JAGOBA MANTEROLA / FOKU

Zeharkaldirako sareak eraikiz

Jone Arruabarrena

Egunero heltzen dira etorkinak Irunera, Lapurdiko muga igarotzeko asmoz. Irungo Harrera Sareko kideek han egiten diete ongi etorria, eta bidaia ahalik eta modu seguruenean egiteko informazioa eskaintzen diete. Aurten, bi gazte hil dira muga Bidasoa ibaitik gurutzatu nahian.
 ©BERRIA

«Bidean sufritu eta gero, oso gogorra da itsasoan noraezean ibiltzea»

Lide Iraola

MSFren ontziak bederatzi egun egin zituen itsasoan, portu batean lehorreratzeko zain. Ostegunean porturatu ziren, eta, orain, migratzaileei emango zaien osasun arretak eta arta psikologikoak kezkatzen dute Font.
Lodosa Bizirik taldeko kideak, Lodosako kaleen izenak gazteleraz eta euskaraz jarri eta gero, plaka berriei eusten. ©BERRIA

Hutsune guztiak bete arte

Ane Etxandi

Euskara sustatzeko hainbat egitasmo gauzatzen ari dira Estellerriko Erriberan. Berriki, kale izenak ele bitan jarri dituzte, eta, orain, Porrusalda plataforma sortu berriaren bidez, euskarazko kultur jarduerak antolatu nahi dituzte.
Mugimendu feministak antolatutako elkarretaratzea, atzo arratsaldean. ©JAIZKI FONTANEDA / FOKU

Gasteizko jaietan jazotako eraso sexistak gaitzetsi ditu mugimendu feministak

Iñaut Matauko Rada

Sei ziztada, bi eraso homofobo eta ukituengatik hiru atxilotu egon dira jaietan. Autodefentsa feminista aldarrikatu dute erasoei aurre egiteko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...