Albistea entzun
Emakumeen aurkako indarkeriari ez
Emakumeen aurkako indarkeriari ez

Espainiako erregearen abdikazioa. Oinordekoa. Felipe Borboikoa

46 urte aginte koroa noiz jantziko zain

Asturiasko printze titulua eskuratu zuen Francoren diktaduraren ostean, eta, erregetza eskuratzen duenean, Felipe VI.a errege izena izango du.

Edurne Begiristain -

2014ko ekainak 3

Felipe Borboikoa eta Greziakoa (Madril, 1968) Juan Carlos I.aren eta Sofia Greziakoaren seme bakarra da. 1977az geroztik Juan Carlos I.aren oinordekoa, Espainiako hurrengo erregea izango da. 1968an Felipe Juan Pablo Alonso de Todos los Santos de Borbon y Grecia izenarekin bataiatu zutenetik, koroa noiz jantziko zain egon da. 46 urteren ostean iritsi zaio garaia: erregetza eskuratzen duenean, Felipe VI.a errege izena izango du.

2004tik Letizia Ortiz Rocasolanorekin ezkonduta dago, eta bi alaba dituzte. Hainbat tituluren jabe da, baina horietatik ezagunena, Asturiasko printzearena. Bigarren Errepublikak eta Francoren diktadurak ezarritako etenaldia igarota, titulu hori eskuratu zuen Felipek. Baina, horrez gain, baditu beste batzuk, hain ezagunak ez direnak: Gironako printzea ere bada, eta baita Vianakoa ere. Horiek gutxi balira ere, Montblanc-eko dukea, Cerverako kondea eta Balaguerreko jauna izendapenak ere baditu.

Diotenez, Espainiako historian «heziketa hoberena» jaso duen erregea izango da. Diziplina zorrotza, behintzat, izan du txiki-txikitatik. Heziketa militarra jaso zuen Felipe Borboikoak, Zaragozako akademia militarrean, eta, besteak beste, lur eta aireko armadetako teniente koronela eta armadako fragata kapitaina da. Heziketa militarra jaso ostean, Zuzenbide ikasketak egin zituen Madrilgo Unibertsitate Autonomoan, eta Nazioarteko Harremanetako masterra gero, Georgetown unibertsitatean (Ameriketako Estatu Batuetan). 1995ean amaitu zituen ikasketak, eta Espainiara itzuli zen.

1986an, adinez nagusi egin zenean, Espainiako Konstituzioaren zina egin zuen Felipe Gonzalez gobernuburuaren eta estatuko erakunde guztietako ordezkarien aurrean. Orduz geroztik, errege familiaren ordezkari gisa jardun du hainbat ekitaldi ofizialetan, eta Espainiako ordezkaria da Hego eta Erdialdeko Ameriketako estatuburuen kargu hartze ekitaldian. 1981ean eman zuen bere lehen diskurtso ofiziala Espainiako errege familiako ordezkari gisa, Oviedon, Asturiasko sarien banaketa ekitaldian. Izan ere, 1993tik aurrera eta etenik gabe, Felipe Borboikoak Asturiasko Printzea sariak banatu ditu.

Euskal Herrian, bihar

Asturiaskoak bakarrik ez, Vianako Printzea sariak ere banatzen ditu Felipe Borboikoak. Horregatik, urtero etortzen da Euskal Herrira, behin gutxienez. Eta, bisitan etortzen den bakoitzean, euskal herritar askok, protesten bitartez, gogoratzen diote Espainiako errege etxea ez dela Euskal Herrian ongietorria. Eta ataka zailean ere utzi izan dute. Duela hiru urte hala gertatu zen. Felipe eta Letizia Borboikoak Iruñeko Baluarte jauregian izan ziren Vianako sariak banatzen, eta, kanpoaldean jendea agurtzen ari zirela, gazte bat hurbildu zitzaien: «Monarkia ala errepublikari buruzko erreferendumera deitzeko zintzotasunik izango al duzu errege zarenean?», itaundu zion Laura Perez Ruabo gazteak Borboikoari. Hark erantzun zion ezin zuela erreferendumera deitu; abdikatuko ote lukeen galdetu, eta «sisteman sinesten» duela eta mekanismo demokratikoekin «dena posible» dela erantzun zion. Ruanok hori bideraezina dela esan, eta Borboikoak, gero eta deserosoago, saihestu eta desbideratu egin nahi izan zuen eztabaida: «Loriarako unea lortu duzu». Ika-mika hark oihartzun handia izan zuen, eta astebetean 511.000 bisita jaso zituen bideoak Youtuben.

Markak hautsiko zituen, seguru, 2013ko otsailaren 22an Donostian izan zela euskaraz hitz egiten saiatu zeneko bideoak ere. «Jardunaldi hauetarako bihotzez bere desiorik onenan opa dizuet (sic)». Euskarazko hitz horiek nekez irakurri zituen Borboikoak Universidad de Navarrak egindako enplegu jardunaldietan.

Aurtengo martxoan izan zen azkenekoz Euskal Herrian, Iñaki Azkuna Bilboko alkatearen omenez izandako hileta elizkizunetan. Bihar berriro etorriko da gurera bisita ofizialean: Nafarroan izango da, Leireko monasterioan, Vianako Printzea saria Jesus Morras historialariari emateko.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

EH Baiko zuzendaritza berria, Baionan ©EH Bai

Euskal Herri burujabea helburu, lurralde elkargo berezia aldarrikatuko du EH Baik

Ekhi Erremundegi Beloki

2022-2026 aldirako bide orri politikoa onartu eta ondoko urteetarako zuzendaritza berria hautatu dute ezkerreko mugimendu abertzaleko kideek. «Karrikan eta instituzioetan borrokatzeko» borondatea erakutsi dute, eta EH Bildureko duten hitzarmen estrategikoa «indartu eta berrituko» dutela erran dute.

KEM talde antimilitaristaren ekintza, Bilboko koartelean. ©BERRIA

«Kuartela auzoarena izan arte!»

Imanol Magro Eizmendi

Hiru igeltsero antimilitaristak Bilboko Juan de Garay kuartel militarra eraisteko lanekin jarraitu dute. 6.500 metro koadroko orubea Iralako auzotarren esku gelditu dadin egin dute lan. Ertzaintzak kalteak eragitea leporatu die.

Foro Sozialak antolatutako mahai inguruko partehartzaileak, herenegun, Donostian. ©ANDONI CANELLADA / FOKU

«Aitortzarako bide bat» zabaldu du Poliziaren Biktimen Balorazio Batzordeak

Julen Aperribai

Poliziaren Biktimen Balorazio Batzordeko presidente Juana Balmasedak biktima horien aitortzan batzordeak egindakoa goretsi du. Lan hori trabatzeko mekanismoak martxan direla ohartarazi du.

EH Baiko kideak, uztailean, kongresuaren aurkezpenean. ©GUILLAUME FAUVEAU

Ezkerreko abertzale guziak biltzeko gai izan nahi du EH Baik

Ekhi Erremundegi Beloki

Bihar eginen du lehen kongresua ezkerreko abertzaleen mugimenduak, eta ondoko urteetarako bide orri politikoa bozkatuko dute. «Parte hartze handia» nabarmendu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...