Emakume transexual baten aurkako eraso bat salatu dute Gasteizen

Ikusgune LGTBI+fobiaren kontrako Behatokiak emakume transexual baten aurkako eraso bat salatu du, Gasteizen. Behatokiak jakinarazi du iragan uztailaren 22an izan zela erasoa, 64 urteko emakumea Gasteizko alde zaharreko taberna batetik ateratzen ari zenean. Atera orduko ezezagun zuen gizonezko bat gerturatu, eta «marikoi zikina» esan zion. Andrazkoak atzera begiratu orduko, hiru ukabilkada eman zizkion, eta lurrera bota zuen.

Ikusgunek jakinarazi du erasoa jasan duen emakumeak salaketa jarri duela Ertzaintzan. Behatokiak gogorarazi du azken hiru hilabeteetan hamalau salaketa jaso dituztela LGTBI+fobiarekin lotuta, «eta trans kolektiboa da eraso fisiko, eta gorrotozko irain eta diskurtso gehien pairatzen ari dena».

LGTBI+fobiaren aurkako Behatokiak dei egin du genero identitate edo sexu orientazioarengatik egon litezkeen erasoei adi egoten segitzera, eta edozein erasoren aurrean Ikusgunerekin harremanetan jartzera. Gainera, azken erasoa salatzeko, elkarretaratze batera deitu dute biharko Gasteizko E28 koordinakundeak, Kutxiko Taskeroek eta Gasteiz Txiki auzo elkarteak. 19:30ean izango da, San Frantzisko aldapan.

Eraso homofoboa Lizarran

Lizarran ere elkarretaratzera deitu dute gaurko, eraso homofobo bat salatzeko. Euskalerria irratiak jakinarazi duenez, uztailaren 14an gertatu zen erasoa: bi pertsonak beste bat iraindu zuten, La Estellesako hiri autobusean. «Marikoi zikina», «gay zikina», «goitik behera zulatuko zaitut», «badakit non bizi zaren» eta halakoak esan zizkioten. Salatu dutenez, hiri garraio enpresak ez zuen ezer egin hori ikusita: «Ez zuen inongo ardurarik hartu ezta inongo erantzunik eman ere eraso homofobo horren aurrean».

Erasoari erantzuteko protesta antolatu dute: gaur, 20:00etan, manifestazioa eginen dute Lizarrako Nafarroa Beherea kalean.