PASCALEN ESFERATIK

Zenbat zero

Xabier Amuriza -

2019ko maiatzak 11
Esan zenbat zero
diren zazpitik gora.

Ez lapur, ez magnate,
ez jauntxo, ez hiltzaile.
Ez jaurti eranskinik,
iraintzat hartzekorik.

Esan, soilik, zero
bakoitzaren azpian
zenbat mila ume
diren gosez hilak
zenbat mila emakume
diren bortxatuak.
Zenbat mila gizaseme
diren miserable
zero bakoitzaren azpian.

Esan: Zu, zu!
Izena eta abizena.
Esan: Zu eta zuek!
Izenak eta abizenak.
Hor dituzu guztiak
ahaltsuen erpinean,
finantzen olinpoan.
Ez joan zulo beltzen bila.
Zuloak aurpegiak dira.