Marianne Vosek irabazi du Giroko bigarren etapa

Marianne Vosi (CCC-Liv) ez zaio irabaztea ahaztu. Inoizko txirrindulari onenak denbora darama Anna van der Breggen (Boels) eta Annemiek van Vleutenen (Mitchelton) itzalean, baina oraindik ere eutsi egiten dio indarrari, kalitateari eta irabazteko goseari. Atzo erakutsi zuen, Italiako Giroko bigarren etapan nagusituta. Italiako lasterketan lortu duen 22. garaipena da. Zortzi ekitaldi ezberdinetan lortu ditu. Uzta eder horri esker, hiru aldiz irabazi du Giroa, 2011n, 2012an eta 2014an.

32 urteko ziklista herbeheretarra izan zen azkarrena Viun hasi eta toki berean amaitu zen saioan. Esprintean gailendu zitzaien Giroa irabazteko hautagai guztiei. Haren atzetik sailkatu zirenen zerrenda ikusi besterik ez dago garaipenaren distiraz jabetzeko: Van Vleuten, Lucinda Brand (Sunweb), Van der Breggen, Soraya Paladin (Ale Cipollini) eta Amanda Spratt (Mitchelton) helmugaratu ziren Vosen atzetik, hurrenez hurren. Zazpigarren iritsi zen Ane Santesteban (WNT-Rotor), lan bikaina eginez. Haiekin batera ailegatu zen Katarzina Niewiadoma (Canyon) liderra. Beraz, poloniarrak maglia arrosari eusten dio. Bi taldekide ditu atzetik: Omer Shapira eta Alena Amialiusik, hamabi eta hemeretzi segundora, hurrenez hurren. Santesteban da lehen euskal herritarra, 22. postuan, 1.50era. Eider Merinok (Movistar) hamabi segundo galdu zituen atzo, eta 24. da nagusian, 1.53ra. Enara Lopezek (Bizkaia-Durango), azkenik, 47 segundo galdu zituen, eta 74. da, 6.01era. Gaur, hirugarren etapa jokatuko dute. Goian amaituko da, Piedicavallo mendatean.