Taldea «batuta eta engaiaturik» ikusten du Callejak

Zailtasunak zailtasun, Alavesek ez du galdu itxaropena. Hala adierazi zuen atzo Javi Callejak, kazetarien galderei itxaron gabe: «Erabat konbentzituta gaude liga amaitzean Alavesek Lehen Mailan jarraituko duela. Jokalarien garapena egokia izaten ari da, eta horrek sinesteko arrazoiak ematen dizkigu». Susperraldi zantzuak ez dira nahi bezain argiak, baina taldea «batuta eta engaiaturik» ikusten du.

Gaurko lehiaren gakoei buruz, uste du «oldarkorragoak» izan behar dutela, «baloiarekin eta baloirik gabe». «Prest egon behar dugu jabetza galtzen dugunerako, eta, gero, erabaki egokiak hartu behar ditugu areara gerturatzean». Galduz gero kolokan egon liteke Callejaren etorkizuna, baina ez du larritasunik. «Motibatuta nago; ez dut presiorik sentitzen».