Eibarrek hutsean berdindu du Rayorekin Unben

Irabazi ezinik dago Eibar oraindik ere. Jada hamar jardunaldi daramatza garaipena lortu gabe, eta horietatik zazpitan esku hutsik bukatu du partida. Atzo, gutxienez, puntu bat bildu zuen, Unben, Rayo Vallecanorekin hutsean berdinduta. Sari txikia da, baina azken bost jardunaldietako bolada txarra eteteko balio dio, aurreko bost neurketetan ez baitzen gai izan puntu bakar bat ere eskuratzeko. Hala ere, gero eta gertuago ditu jaisteko postuak. Gaur-gaurkoz, lau puntura ditu, baina aldea txikiagoa izan daiteke jardunaldian egon daitezkeen emaitzen arabera. Lehenbailehen suspertu beharra du, estutasunak saihesteko.

Beste behin, ate aurrean huts egin zuen. Aukerak sortu, sortu zituen, eta onak, baina ez zen gai izan zelaian izandako nagusitasuna gol bat sartuta indartzeko. Haren zorionerako, sendo aritu zen atzean, eta ondo eutsi zion Rayo Vallecanori.

Athletic eta Reala, gaur

Athleticek eta Realak, berriz, gaur jokatuko dute. Etxetik kanpo ariko dira biak: zuri-gorriak, Granadillaren zelaian (12:00), eta txuri-urdinak, Espanyolenean (16:00, Movistar Vamos). Bolada onari eutsi nahi diote biek: Athleticek laugarren jardunaldia egin nahi du galdu gabe —bi partida irabazi ditu, eta bat berdindu—, eta horri esker, jaitsieratik urrundu; Realak, berriz, seigarren partida egin nahi du galdu gabe —lau irabazi ditu eta bat berdindu—, eta goiko postuetan sendotu.