Utzi iparra galtzen

Estreinatu: lehen aldiz eman, jantzi, erakutsi, antzeztu, pantailetara ekarri... Horra nagusitu den hitza, Handia filma Ipar Euskal Herriko pantailetara iritsiko dela iragartzean. Handia estreinatu dute Ipar Euskal Herrian. Baita nihaurren testuetan ere. Eta bada nonbait errealitate baten ispilu. Zinemaren sektorea biziki lotua da estatuei. Muga administratiboak Euskal Herriko filmen zirkulazioa zailtzen du biziki. Alde horretatik, agian Ipar hori atxikitzeak badu bere zentzu. Baina, aldiz, estreinatu?

Euskal Herritik begiratuz geroz, jadanik estreinatua da. Urrian da lehen aldiz pantailaratu. Baina betikoa. Nondik begiratzen den. Frantzian estreinatuko dela urtarrilaren 24an. Hori dio Frantziako Estatuko banaketaz arduratzen den Gabarra banatzaileak. Horrek du banatzen Ipar Euskal Herrian Handia. Ipar Euskal Herriko zinemetan aurrestreinaldiakaipatzen ditu. Eta horra Erandioko lagunaren oharra. Ezin ukatua. Nola Ipar Euskal Herria gero eta urrunago gelditzen ari den. Urruneko Kanariak balira bezala.

«Kontuz ardiekin!», dio ironiaz lagunak, Baionara sartzekotan naizela... Periferia izatea zer den. Klixeak ez dira txikiak. Nafarrek ere badakite zerbait horretaz. Ez da berritasun bat. Baina badirudi amildegituz doala. Beste adibide bat. Ipar Euskal Herriko ordezkariek Parisen daramaten lanaz. Hala da. Zehatz izan behar. Baina, aldi berean, indartzen du ideia hau. Han posible da, hango urruneko lur haietan gauzak arrunt desberdinak direlako. Bestaldean inposible... Ipar kenduz, zer gelditzen da? Euskal Herriko ordezkaritza. Horra Kanariak eta perspektibak hurbilduak.