Arrasate

Sutan jartzean probatzen da eltzea. Hala dio esaerak. Eltzea Sarek jarri du, eta sua Espainiako eskuin muturrak. Suari egurra bota diote nonahitik, eta, beraz, eltzea presio eltze bihurtu zaio Sareri. «Presio izendaezina», salatu du. Eta jakina da presio eltzeek lehertzeko arriskua dutela. Garaiz sutatik kentzea da konponbide bat, eta horixe egitea erabaki du Sarek. Eltzea salbatuko du, lehertu gabe; eta sua, bera bakarrik itzaliko da.

Azken batean, zein zen Sareren helburua Arrasaten egin nahi zuen martxarekin? 7/2003 legea bertan behera uzteko eskatzea. Eta zer nahi zuten Voxek eta PPk mobilizazio horren kontra egitera Arrasatera etorrita? Liskarra. Sarek lan handia egin du Arrasaten egitekoa zen martxaren karietara: herriko hainbat elkarterekin landu du presoei «bizi osorako kartzela» ekartzen dien legearen gaia. Orain, hautsak erabat harrotu diren honetan, mobilizazio jakin hori ez egitea erabaki dute, baina aldarrikapena herri guztietara zabalduko da. Zalaparta honetan, gainera, Sarek aukera izan du bere aldarrikapena lau haizeetara zabaltzeko, eta entzun nahi izan duenak entzun du —nahi izan ez duenak, ez—. Espainiako eskuinak, aitzitik, bazterrak nahastu ditu, baina gaur Arrasaten eragin nahi zuen iskanbila ez du lortuko —hori eragozten saiatu da, behintzat, Sare—.

Mobilizazio jakin bat ez egitea lortu du eskuinak? Bai. Aldarrikapena zabaltzea, baina, ez du eragotzi.