Larrua, larruen aurka

Jantzigintzan animalien larrua erabiltzearen aurkako protesta egin zuen atzo Piztiak konpartsa animalistak Bilboko Arriaga plazan
Termometroak 11 gradu markatzen zuen arren, hogeiren bat pertsona biluztu ziren.
Termometroak 11 gradu markatzen zuen arren, hogeiren bat pertsona biluztu ziren. LUIS JAUREGIALTZO / ARGAZKI PRESS

Erredakzioa -

2018ko urtarrilak 14
Negu gorria izan arren, Bilboko Arriaga plazaren zoruan biluzik etzan ziren atzo eguerdian pare bat dozena gizon eta emakume. Piztiak konpartsak —Bilboko jaien antolatzaileetako batek— deitutako protesta bat zen: gezurrezko odolez estalita, jantzigintzarako erabiltzen diren animalien egoeraz sentsibilizatu nahi izan zuten publikoa. Bost minutuz egon ziren horrela, plazan etzanda; bitartean, konpartsako beste kide batzuek Larrua erailketa da leloa osatu zuten atzealdean, hizki handi batzuekin. Amaieran, antolatzaileek ekarritako termoekin berotu ziren protestariak.

Konpartsako arduradunek geroago ohar bidez jakinarazi zutenez, larruen industriak «ikaragarrizko sufrimendua» eragiten die animaliei; haiek «ito, jipoitu, elektrokutatu» edo «zuzenean larrutzen» dituzte maiz, berokiak eta antzerakoak ekoizteko. Industriako arduradunei ez ezik, jantziok erosten dituzten herritar arruntei ere eskatu zieten «esplotazio» horretan ez parte hartzeko: «Kontsumitzaile gisa hartzen ditugun erabakiek animalia babesgabe horiek salbatu edo kondenatu ditzakete».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna