Albistea entzun

Eibar 3-0 Alaves

Bati bizipoza, besteari kezka

Eibarrek aise irabazi dio derbia Alavesi, eta irabazi gabeko bolada txar bat amaitzea lortu du. Kike Garcia izan da protagonista, hiru gol sartu baititu. Mailari eusteko lehia are gehiago estutu da
Kike, atzo sartu zituen hiru goletako bat ospatzen, eta Alaveskoak, burumakur, Ipuruako derbian.
Kike, atzo sartu zituen hiru goletako bat ospatzen, eta Alaveskoak, burumakur, Ipuruako derbian. JUAN HERRERO / EFE Tamaina handiagoan ikusi

Iñigo Lasa -

2021eko maiatzak 2

Golak. 1-0: Kikek (3. min.); 2-0: Kikek (50. min.); 3-0: Kikek (59. min.). Epailea. Munuera Montero. Txartel horiak: Alaveseko Pina eta Battagliari.

Esperantza da azkena galtzen dena, eta, matematikak kontrakoa esan bitartean, Eibarrek sinesten jarraituko du. Sasoiko partidarik borobilena egin zuen atzo talde armaginak, eta Alavesek, aldiz, txarrena. Markagailuak ez du gezurrik esaten: 3-0 etxeko taldearen alde, nagusitasun osoz. Urtarrilaren 3tik ez zuen partida bat irabazten Eibarrek. Orduan ere Ipuruan izan zen, Granadaren aurka (2-0). Atzo, irabazi gabeko hamasei partidako bolada amaitzea lortzeaz gain, mailari eusteko helburua bizirik mantentzea lortu dute.

Gipuzkoarren garaipenarekin, are gehiago estutu da sailkapenaren beheko aldea, armaginen onurarako eta babazorroen kaltetarako. Eibarrek zuloan jarraitzen du, 26 punturekin; bakarrera ditu Elx, Huesca eta Valladolid (gaur jokatuko du) eta, haiekin batera, aurreko astera arte hain urruti zegoen salbazioa. Gasteiztarrak hobeto daude, baina ez etxafuegoak botatzeko moduan. 31 punturekin, jaitsiera postuetatik puntu bakar batera da Alaves. Lau jardunaldi geratzen dira, eta ezer ere ez dago erabakita. Adi ibili behar.

Egoerak hala behartuta, gogor ekin zion Eibarrek lehiari. Lehen zatian, partidaren jaun eta jabe izan ziren gipuzkoarrak. Aurreneko minutuetatik, armaginek hain berea duten jokoa egitea lortu zuten: goian estutu, aurkariaren atetik gertu lapurtu, eta area erdiraketaz josi. Jose Luis Mendilibarrek aise irabazi zion arbeleko lehia Javi Callejari. Arabako taldea lo zelairatu zen: haizeak nondik jotzen zien ere ez zekiten jokalariek. Etxeko taldearen betiko jokoak ezustean harrapatu zituela ematen zuen.

Eibarrek hasiera-hasieratik eraman zuen zelaiko nagusitasuna markagailura. Hirugarren minuturako, aurretik zen etxeko taldea. Alboko sake bat area barruan sartu, eta jokalari guztien artean Kike Garciari —nori bestela— erori zitzaion baloia: 1-0. Hain jardunaldi gutxiren faltan, eta gauzak nola dauden ikusita, talde askok abantaila babestea aukeratuko zuketen, baina Mendilibarren taldea ezberdina da, eta justu kontrakoa egitea erabaki zuen: bigarrenaren bila joatea. Aldea bikoizteko abaguneak izan zituen. Kike Garcia, Bryan Gil eta Edu Exposito gola egitear izan ziren, baina ez zuten lortu baloia Pachecoren ate barrura bidaltzea. Errenta txikiegia zen zelaian ikusi zenerako.

Kike protagonista

Babazorroak noraezean ibili ziren lehen zati osoan. Apenas iritsi ziren Eibarren area ingurura. 32. minutuan jaurti zuten estreinakoz hiru zutoinen artera, Lucas Perezen bitartez. Atsedenaldira gol bateko desabantailarekin bakarrik iristea izan zen gasteiztarrentzat albiste on bakarra. Bigarren zatia hasi bezain pronto lortu zuen etxeko taldeak partidako bigarren gola. Kike Garciak, berriz ere, bikain baliatu zuen Edu Expositoren erdiraketa, eta hanka puntarekin Pacheco gainditzea lortu zuen. Plana ondo ez zihoala ikusita, zuhaitza astindu eta bi aldaketa egin zituen Callejak: Pere Pons eta Luis Rioja zelairatu zituen Pinaren eta Edgarren ordez. Jokalariak bai, baina jokatzeko era ez zuen aldatu teknikari gasteiztarrak, eta Eibarren nagusitasunak bere horretan jarraitu zuen. Hori berresteko sartu zuen hirugarrena Kikek, beretzat lehendabiziko hat-trick-a, eta Eibarreko jokalari batek Lehen Mailan sartzen duen aurrenekoa.

Datorren jardunaldian, Eibarrek Getaferi egin beharko dio bisita, eta Alavesek Levante hartuko du, Mendizorrotzan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©FOKU

Zergatik izan da «ametsa»?

Aitor Manterola Garate

Denboraldi eskasa egitearen ondorioz jaitsi da Eibar Bigarren Mailara. Zelaian ez du ia ezertan asmatu, baina ardurak klub osora zabaldu behar dira.

Iñaki Artola, gaur, garaipena ospatzen Bilboko Bizkaia pilotalekuan. ©Aritz Loiola / Foku

Rezusta eta Artola, final-laurdenetara

Berria

Rezustak 14-22 irabazi dio Bengoetxea VI.ari, eta Artola 22-18 gailendu zaio Agirreri.

Bernal, gaur, Campo Feliceko gainean. ©Luca Zennaro / EFE

Etapa eta lidergoa Bernalentzat

Berria

Azken kilometroan eraso bortitza jo du kolonbiarrak, eta inork ezin izan dio eutsi. Bigarren Ciccone izan da, eta hirugarren Vlasov.

Baionako jokalariak Tolosan (Okzitania), atzo, garaipena ospatzen. ©Aviron

Baionako jokalariek 'Txoria txori' abestuz ospatu dute Tolosan lortutako garaipena

Paulo Ostolaza

Top14an mailari eusteko lehian dabil Aviron, eta ezusteko garaipena eskuratu du liderraren zelaian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.