UHINETATIK TIRAKA

Agenda zaharkituak

Xabier Lasa -

2018ko apirilak 22
Betikoei hitza ematen. ETAk biktimak sailkatzeaz mintzatu dira egunotan. Paradoxikoki, aspektu hori beren albistegi eta tertulietara eraman dutenak izan dira biktimak kategorizatzen nabarmendu zaizkigunak. Beste behin, betiko biktimen erreakzioak jaso dituzte, aurrez deliberatuta, edo automatizatuta, daukatelako biktima horiei eman behar zaiela aukera, eta ez beste askori, publikoki iritzia eman dezaten. Nonbait, hautatu horiek dira aparteko abilitatea daukatenak, unero eta edozein gertakizunen aurrean, interpretatzeko ETAk eragindako makina bat biktimek eta euren senideek zer pentsatzen duten. Testuinguru historiko berriek ez ote dute eskatzen aireberritzea funtzionatzeko eskema zaharkituak eta kontaktuen agendak? Milaka pertsonez osatutako giza espektro zabalean arakatzeko ahalegina eginez gero, ez ote zaizkie aterako artean aditu gabeko ahotsak, publikoki iritzi erakargarriak transmititzeko gogoz?

Evole, taxian. Ezin une aproposagoan heldu zen Roberto Mosok Jordi Evolerekin atzo eduki zuen elkarrizketa luzea Mas que palabras-en, kontuan hartuta gaur gauean Santi Brouarden hilketa izango duela hizpide Salvados saioan, LaSextan. COPEko jarraitzaile den taxilaria lekuko zuzena izan zuten, eta hark normalki entzungo ez dituen iritziak irentsi arazi zizkioten. Boterearen presioak komunikabideei, adierazpen askatasuna, pertsonaje publikoei buruzko iritzi pertsonalak… Guztiaz mintzatzen ari zirela, Evoleri egozentrismo puntua irten zitzaion barrutik, bere hotsa proklamatuz ahots bakana Kataluniako auziaz Espainian nagusi den diskurtso uniformetik kanpo. Mosori bizkortasun pittin bat falta izan zitzaion galdetzeko ea nola ikusten duen LaSextako lankideak (Iñaki Lopez, Antonio G. Ferreras, Ana Pastor…) espainolismoaren kausara lerrokatzea.



Evole, gaztelaniaz. Katalanezko abesti bat jarri ziguten solasaldiaren atarian; ondoren zetorren gonbidatuarekin identifikatzeko, keinu moduan ulertu beharko genuke. Enfin, katalana da Evole, bai, baino kazetaritza gaztelaniaz praktikatzen du, gaztelania hizkuntza hegemonikoa duen Espainiako estatuko audientzia da bere kontsumitzaile nagusia, eta gizona ez da baliatzen telebistan daukan pribilegiozko audientziaz gaztelania ez diren estatuko beste hizkuntzen aldeko interesa eta enpatia zabaltzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna