Klinika bateko zeladoreak eginiko sexu erasoa salatu du andre batek Bilbon

Proba mediko baterako lokartu izana aprobetxatu zuen ukituak egiteko. Mugimendu feministak elkarretaratzera deitu du gaurko, Orozkon
Eraso sexista bat salatzeko elkarretaratzea, Urduñan (Bizkaia).
Eraso sexista bat salatzeko elkarretaratzea, Urduñan (Bizkaia). J. FONTANDEA / FOKU

Erredakzioa -

2019ko martxoak 20
Emakume batek salatu du zeladore batek sexu eraso bat egin diola Bilboko klinika pribatu batean. Andrea Orozkokoa da (Bizkaia). Astelehen goizean izan zen jazoera. Salaketa ipini du Ertzaintzan, eta, ondoren, mediku probak egin dizkiote ospitalean.

Aiaraldea.eus atariak eman du erasoaren berri. Emakumeak berak kontatu die gertatutakoa. Kolonoskopia bat egitera joan zen Bilbora astelehen goizean. Bukatutakoan egin zion eraso: «Proba egin eta gero, boxetara igo ninduten, oraindik lasaigarrien eraginpean nengoela. Zeladoreak —gizonezkoa— atzamarrak sartu zizkidan baginan. 'Lasai, gozatu, erlaxatu...', esaten zidan. Begiak ireki nituen, ez nekien zer egin, ez nuen sinistu nahi». Emakumearen lekukotzaren arabera, gero bularrak ukitu zitzaion.

Erietxetik irten aurretik medikuarekin hitz egitea erabaki zuen. «Gaizki sentitzen nintzen. Lotsa gainditu eta dena kontatu nion». Medikua salaketaren larritasunaz jabetu zen, eta solairuko arduradunarengana jo zuten segidan. Hark andrearekin izandako jarrera ez zen egokia izan: «Seguru nengoen galdetu zidan, zalantzakor. 'Emakumeok badakigu non sartzen diguten eskua', argitu nion». Erasotzaileak gero izandako jarrera ere salatu du andreak: «Medikuarekin ari nintzela irribarretsu sartu zen bulegora. Igogailuraino jarraitu zidan, 'egun zoriontsua izan' esateko». Aiaraldeko mugimendu feministak eta Matxintxuk taldeak «elkartasun osoa» adierazi diote. Gaurko elkarretaratze bat antolatu dute, Orozkon bertan: 19:30ean, Zubiaur plazan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna