Alavesek ez du aukerarik izan Bartzelonaren zelaian, eta 9-1 galdu du

Aurreikuspenak bete egin ziren atzo, eta Alavesek astindua hartu zuen Bartzelona ahaltsuaren zelaian: 9-1. Arabarrak, hala ere, gai izan ziren orain arte ligan inork egin ez zuena lortzeko: katalanei gol bat sartzea. Partidako aurreneko gola izan zen, eta Jordan Clarkek sartu zuen, hamaseigarren minutuan. Baina berehala etorri zen etxekoen erauntsia: hiru gol sartu zituzten lehen zatia amaitu aurretik, eta beste sei bigarren zatian.

Lehen hiru partidak irabazi eta gero, azken biak galdu ditu Alavesek —asteazkenean Atletico Madrilen aurka galdu zuen—. Koska batzuk gorago dauden bi talderen aurka izan dira bi porrot horiek, eta etxetik at. Beraz, harro egon daitezke orain arte eginiko lanaz.

Beste hiru euskal taldeek gaur jokatuko dute, eta hirurak etxean ariko dira. Eibarrek bolada txarra eten nahi du, Unben Rayo Vallecanori irabazita (11:30). Eibartarrek galdu egin dituzte azken hiru neurketak. Oso bestelakoa da Realaren egoera: jokatu dituen lau partidak irabazi ditu. Gaur, bosgarren garaipena lortu nahi du, Zubietan, Vila-realen kontra (12:00). Ordu berean ariko da Athletic Lezaman, Real Madrilen aurka. Zuri-gorriak gora begira daude, hamabi puntutatik bederatzi eskuratuta. Espainiako taldearen hasiera eskasa baliatu nahi dute.

Amorebietak, berdindu

Bigarren Mailan, berriz, Amorebietak bana berdindu zuen atzo Lezaman Sportingekin. Zornotzarrei azken unean egin zien ihes garaipenak, bisitariek 82. minutuan berdindu baitzuten 18. minutuan Larruzeak sartutako gola. Eibarrek gaur jokatuko du, Ipuruan, Eivissaren aurka (14:00, Movistar La Liga). Eibartarrek bolada onari eutsi nahi diote, lehen bi partidak galdu eta gero, hiru irabazi eta bi berdindu baitituzte jarraian.