Txantiloia

Duela gutxi, Bilduko senatari Jon Iñarrituk ohartarazi zuen gerta zitekeela estatuak euskal txantiloia erabiltzea Katalunian. Esan, eta egin. Asteazkenean, polizia espainol kaputxadun batzuek atxilo hartu zituzten CUPeko bi alkate eta beste hamabi lagun, epaileen baimenik izan gabe. Atxiloketek ikaragarrizko oihartzuna izan dute. Manifestazioak egin dituzte hiri askotan, eta alderdi independentistek eta Comukoek alde egin zuten ordu batzuetan parlamentutik. Gobernuak kereila judizial bat aurkeztu du Espainiako Gobernuaren kontra. Atxiloketa horien bitartez, Espainiako Gobernuak ezinezko bihurtu du Kataluniako alderdiek baiezko botoa ematea Espainiako aurrekontuei.

Polizia ekintza horrek bat egin zuen oso bestelako albiste pare batekin. Batetik, Pedro Sanchezek mintzaldi bat egin zuen Europako Parlamentuan, eta, bestetik, Torrak bilera bat egin zuen AEBetako sei kongresukiderekin, Washingtonen.

Mintzaldi horretan, Sanchez estu eta larri ibili zen: alde batetik, hemizikloa hutsik zegoelako ia, eta bilduriko diputatuetako askok kartelak eraman zituztelako preso politiko eta erbesteratu katalanen aldekoak; bestetik, besteren hitzaldietan aditu behar izan zuelako nola eskatzen zuten preso horiek askatzeko, eta zein gogor kritikatu zuten Espainiaren jokabidea. Sanchezek aditu behar izan zuen nola konparatzen zuten Espainia Turkiarekin; kazetari batek galdetu zion ea iruditzen zitzaion Espainia demokrazia bat dela.

Torrak Washingtonen eginiko bileran, berriz,John Lewis izan zen, eskubide zibilen aldeko mugimenduaren lider historikoa eta gaur egungo politikari estatubatuarretan errespetatuena. Bai batean eta bai bestean, argi geratu zen Espainiak galdu egiten duela independentziaren aldeko borroka demokraziaren aldeko bihurtzen duenean.