Albistea entzun

ZUZENDARIEN GALEUSCA

Aragones

Vicent Partal - 'Vilaweb'-eko zuzendaria

2021eko maiatzak 23

Pere Aragones izendatu dute Kataluniako Generalitateko presidente, 132.a. Harekin, Esquerra Republicana kargu instituzional gorenera itzuli da, Generalitate autonomikoko lehenbiziko lau presidenteen, hau da, Maciaren, Companysen, Irlaren eta Tarradellasen ondotik, eta, batez ere, luzaz alderdia berreraikitzen aritu eta independentismoaren barnean hegemonia lortzeko borrokatu ondotik.

Gogoan izanen duzue, Maria eta Martxelo, Kataluniako politikaren akrobaziak aipatu nizkizuela joan den astean, bai eta gobernu osaketaren auzia ere, zeina orduan hain zaila iruditzen zitzaigun denoi; bada, auzi hori ere akrobaziak eginez konpondu dute. Pere Aragones bera eta Junts-en ordezkari Jordi Sanchez lanean aritu ziren aste hondarrean, fokuen argipetik urrun: larunbatean, Soler de n'Hug izeneko masian bildu ziren; igandean, berriz, Can Magarola etxean, Alellan, eta, hasmentan zaila zirudien arren, akordioa egitea lortu zuten. Ezohiko osagai bat ere bazegoen honetan guzian: Juntseko negoziatzaileak kartzelara itzuli behar izan zuen lo egitera, negoziazioen erdian.

Akordioa politikari pragmatikoen arteko itun bat da: diskurtso ofizialetik aldentzen du aldebakartasuna, eta Puigdemont presidentea zokoratu, nahiz eta Puigdemontek berak erabaki zuen Sanchezekin negoziatzea. Bi urtez, Espainiako Gobernuarekin ituna egiten saiatuko dira, eta kito. Hori da dena, eta ez dago urrunago joateko asmorik. Alde horretatik, Esquerraren tesiak gailendu dira argi eta garbi, independentzia bertze belaunaldi baterako utzi baita. Horren ordainetan, Junts ez da gelditu botere guneetatik kanpo; are gehiago, anitz irabazi du gobernatzeko gaitasunari eta eskumenei dagokienez. Inork ez zuen espero Esquerrak hainbertze amore ematerik...

Behin hori erranda, ikusiko dugu, bertze hainbatetan bezala, kaleak zer dioen. Oraingoz, akordioak lasaitasuna eragin du, inor gutxiri iruditzen baitzitzaion ideia ona botoen %52, hau da, independentismoak eskuraturiko botoak alferrik galtzea. Bertze kontu bat da akordioa gustatzea, eta, bereziki, independentziari uko egin izana ontzat hartzea. Baina kalearen eta politikarien arteko tentsioa ez da gauza berria hemen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.