Patxi Larrion Galdeano.
ELE

Lurpeko urak

2022ko abuztuaren 13a
00:00
Entzun
Leire Bilbaori irakurri diot: «Etxean igeri egiteko etxea izan behar da / norbere urak eta norbere itomenak». Poemak ur-aztia ekarri dit gomutara.

Oroitzapenak 40 urte pasatxo ditu. Larrain zaharrean gara, txikia da alorra. Aita zenak, osaba Emilio tarteko, ur-bilatzailea ekarri du. Hurritza eskuan urrats sendoak egiten, Mattin Trekuren teknika darabil. Halako batean alorraren erdialdean geratu eta honela esan digu: «Hemen emaria sumatzen dut».

Gure eskualdean lurpeko ura bilatzeko sukarra piztu zen 1980ko hamarkadaren hasieran. Argia zen afera: Espainiako Gobernuak laster indarrean jarriko zuen lur azpiko uren erabilera arautzeko lege berria, 1879koa indargabetuko zuena.

Lurra zulatzeak bazuen bere kostua, baina saria ez zen nolanahikoa: urte osoan ur freskoa eta garbia etxean bertan, eta doan. Esaterako, gure larrainetik ehun bat metrora, itsaso bat bilduta zeukan auzokide batek. Hamalau koadroko pilotaleku baten pean ur-tanga erraldoia, etxean igeri egiteko lain, eta oro ezkutuan. Ur hori lurrari erauzia zen, eta batzuen aburuz ur-zerbitzu publikoari ebatsia.

Aipatu legea 1985eko abuztuan jarri zuten indarrean. Ordurako ur erauzketak biderkatuak ziren.

Aitak zulatzea baztertu zuen. Aspalditik dugu ur-zerbitzua larrainen bertan, kontagailua eta guzti. Egun ere, lurpeko ur-baliabideen gehiegizko ustiatzea ezkutuan gertatzen da; ondorioak, beraz, agerikoak dira.

Aste honetan, ur-ebaslearen afera dela-eta, Amaia Ezpeldoiren deia jaso dut. Zelatariak zelatatzeko maneraz mintzatu gara. Atharratzeko mendi idorretan laketu zenetik euri zitalari esker bizi da Joana Garraldarekin. Ez du hona etortzeko asmorik.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.