Athleticek eta Realak laugarren postura igotzeko aukera dute gaur

Athleticek eta Realak ligako 26. jardunaldiko partidak jokatuko dituzte gaur, eta biek helburu bera dute: laugarren postua. Betisek galdu egin zuen atzo, eta euskal taldeen esku utzi du postu hori. Horretarako, baina, irabazi egin behar dute. Athleticek etxean jokatuko du, baina ez Lezaman, San Mames handian baizik (13:00, Vamos), eta Levante aurkari zuzena izango du parean. Realak, aldiz, aurkari samurragoa du ustez, Espanyolen aurka ariko baita, Bartzelonan (11:00).

Athletic San Mamesera itzuliko da gaur. Atletico Madrilen aurkako partidan 40.000 ikusletik gora bildu ziren, eta sukar hura egun bateko kontua izan ote zen neurtzeko balio izango du. Partida Bizkaiko futbolaren festa izatea nahi du klubak, eta sarreren dirua lurraldeko 34 kluben artean banatzeko izango da. Partida aurreko ekitaldietan ere nabaria izango da klub horiekiko senidetasun harremana. Kirol arloari dagokionez, Athleticek azken bi partidak galdu ditu, eta ez dago sasoi onean. Lehen itzuliko partidan, 2-0 galdu zuen Valentzian.

Realaren joera, aldiz, aurkakoa da, jokaturiko azken bi partidak irabazi baititu. Jokalariek onartu dute laugarren bukatzea jarri dutela helburu azken bost jardunaldietarako, hori baita Kopako final prestatzeko modurik onena. Espanyolek, berriz, ezer gutxi du jokoan. Lehen itzuliko partidan hutsean bukatu zuten Zubietan.

Bestalde, Bigarren Mailan, Alavesek Mendizorrotzan jokatuko du aurreneko aldiz (12:00). Gasteizko taldeak Athletic B hartuko du, eta harmailak betetzea espero da. Alaves bere multzoko lehen postuan dago, eta, irabaziz gero, postu horretan bukatuko duela ziurta dezake. Athletic B, ordea, laugarren dago.