Azken hilabeteko gaixo gehien dago orain Hego Euskal Herriko ZIUetan

Asteotako kutsatzeak nabarmen ari dira eragiten ospitaleetan: positiboen kopuruak igo ahala, larriagotu egiten ari da ospitaleetako egoera. Hegoaldean, osteguneko datuak oinarri, 645 pertsona daude ospitaleratuta. Horietatik 498 ospitaleetako gela arruntetan daude, eta 147 ZIU zainketa intentsiboetako unitateetan. Hain justu, eremu horretako oheen okupazioa etengabe ari da igotzen, eta martxoaren 3tik ZIUetan izandako kopururik handiena da herenegungoa.

Ospitaleetako egoerarekin kezkatuta daude osasun agintariak. Santos Indurain Nafarroako Gobernuko Osasun kontseilariak ohartarazi du lurraldearen osasun egoera «oso kezkagarria» dela, bereziki ospitaleen eta ZIUen gaineko presioagatik. Datua eman du Indurainek: ospitaleratutako pazienteak gero eta gazteagoak dira, eta gero eta larriago erietxeratzen dituzte. Eta abisua eman du: «Intzidentzia tasa gelditu beharra dago, erietxeak tentsioan jartzen ari direlako». Nafarroan 31 lagun daude ZIUetan. Eta Nafarroako Gobernuak jakinarazi duenez, 95 urteko emakumezko bat hil zen herenegun.

Transmisioari buruzko datuak ere ilunak dira oso Hego Euskal Herrian. Nafarroako Gobernuak eta Eusko Jaurlaritzak emandako informazioaren arabera, herenegun 13.901 proba egin ziren birusa detektatzeko, eta 1.085 kasu atzeman zituzten. Positiboen portzentajea ere kezkatzeko modukoa da: osteguneko testetan %7,8k eman zuten positibo. Kutsatuen datuak lurraldeka aztertuta, Gipuzkoan atzeman zuten positibo gehien: Osakidetzak 334 kasu zenbatu zituen herrialde horretan. Bizkaia du atzetik: 314 positibo izan ziren han. Nafarroan, berriz, 293 kutsatu zenbatu zituzten, eta Araban, 140.

Arabako, Bizkaiko eta Gipuzkoako datuak ez direla onak aitortu du Jonan Fernandez Labiren batzorde teknikoko koordinatzaileak, baina uste du joera hori astebete barru eten egingo dela. «Espero dugu hurrengo egunetan goia jotzea goranzko joerak». Bestalde, jakinarazi du Jaurlaritza aztertzen ari dela maiatzaren 9tik aurrera alarma egoera bertan behera utziz gero zein tresna juridiko erabili pandemiaren hedapena gelditzeko.