Iheslarientzako gida bat prestatu du Jaurlaritzak

Ukrainako gerratik ihesi Arabara, Bizkaira edo Gipuzkoara iritsitakoentzat gida bat landu du Eusko Jaurlaritzak, ostaturako baliabideen eta dokumentazioarekin lotutako izapideen berri emateko. Hain zuzen, hemen bizitzeko baimena edo nazioarteko babesa eskatzeko jarraibideei buruzko informazioa ematen du gidak, eta nola erroldatu ere azaltzen du, baita osasun, hezkuntza, enplegu eta gizarte zerbitzuetara nola jo ere.

Talde zaurgarrientzat berariazko informazioa eskaintzen du gidak, batik bat adingabeentzat, indarkeria matxista jasan duten andreentzat eta LGTBI kolektiboko kideentzat. Euskaraz, gaztelaniaz eta ukraineraz argitaratu dute; izapideetako aldaketak jasota, tarteka gida eguneratuko dute.