Falta zitzaion urrea irabazi du Hirscherrek

Sei aldiz Munduko Kopa irabazitakoa eta lehiaketa horretako 54 proba bereganatutakoa, lau aldiz Munduko txapeldun izandakoa... Garaipen zerrenda ikusgarria zuen Marcel Hirscher austriarrak, baina arantza bat zeukan sartuta: inoiz ez zuen urrezko dominarik irabazi Olinpiar Jokoetan; zilarrezko bat, besterik ez. Atzo, ordea, arantza atera zuen, eski alpinoko konbinatua irabazi baitzuen. Behetik gora egin zuen, 12. izan baitzen jaitsieran.