Albistea entzun

Karolina Sarasua

Kontzientzia du akuilu

Irain eta mehatxu sexistak salatu ondotik jaso duen babesa «eskertu» du Osasunako jokalariak, eta halako jarrerak dituztenen kontrako neurriak hartzera dei egin die agintariei: «Instalazioetan sartzea debekatu behar zaie».
OSASUNA Tamaina handiagoan ikusi

Jon Ander De la Hoz -

2021eko urriak 12

«Ama batek idatzitako txio bat ikusi dut. Guri eskerrak eman besterik ezin duela egin idatzi du, gure ausardiarengatik. 10 urteko alaba bat duela, futbolean ari dena», Karolina Sarasua (Iruñea, 2004) Osasuna B-ko jokalariak Santanderreko (Espainia) Nueva Montaña taldearen aurkako partidan irain eta mehatxu sexistak jaso ondotik haiek publikoki salatzea erabaki zuenean, errealitate bat agerian jartzeko egin zuen, eta, bereziki, gaitz hori etorkizuneko jokalariek bizi behar ez izateko: «Futbolean aritzeko ilusioa duten 12-13 urtekoengan pentsatu dut, neuregan baino gehiago. Haiengatik egin nuen gehienbat».

Etorkizunari ez-ezik, ordea, gaurkotasunari erabat lotutako gaia da irain eta mehatxuena. Partida amaituta, Sarasuak eta haren taldekideek zerrendatu, eta sare sozialetan zabaldu zituzten larunbateko neurketan entzundakoak: «Aldagelan sartu eta bortxatu egingo zaitut; zure amak zupatu egiten dit; altxa elastikoa, eta erakutsi titiak eta ipurdia». Hori lagin bat besterik ez da.

Egoera horretan, Sarasuak «kito» esatea erabaki zuen. Lucia Fernandez epaileak berak animatu zuen horretara, hark ere jaso zituelako, eta aktan bildu zituen: «Espero dut partidetan, lehen iraina edo mehatxua entzun orduko, neurketa geratzea, egileak kanporatzea, eta kirol instalazioetan sartzen ez uztea, ez baitute merezi». Egoerari ikusgaitasuna emateko gakotzat jo du partida geratzea: «Partida ez bada geratzen, eta jazartzen segi dezaten uzten bada... Niretzat, geratu egin behar da, bota, eta berriz hasi. Eta ezin bada, beste egun batean jokatzeko prest ere egongo ginateke». Nueva Montañaren eta Osasunaren arteko partidan amaitu arte segitu zuten jokatzen, Sarasuak azaldu duenez, oihuak estadioaren kanpoaldetik egin zirelako. «Ulertzen dut epailea. Kasu honetan, astakeria horiek esan zituztenak kanpoan zeuden, eta ez dakit jokoa geratu ahalko zukeen».

Sarasuak eta haren taldekideek egindako salaketak oihartzun handia izan du. Asko izan dira beren babesa adierazi duten jokalariak, klubak eta norbanakoak. Beren jarrera zabaltzea ahalbidetu du horrek: «Hasieran, ez nuen uste jendeak hainbeste babestuko gintuenik. Esaterako, Alexia Putellasen moduko izar batek txio bat idaztea. Taldea eta ni oso eskertuta gaude egindako guztiarengatik». Bartzelonako jokalaria da Putellas, eta aurten Urrezko Baloia jasotzeko hautagai izendatu dute.

Sarasuak uste du babes hori laguntza dela higuinari aurre egiteko garaian: «Ikusita jendeak izan duen jarrera eta nolako babesa eman duen, oso eskertuta nago. Espero dut honekin gizartearen pentsamoldea apur bat aldatzea». Halaber, hitzetik ekintzetara igarotzea galdegin eta zigorrak eskatu ditu: «Ez diezaietela berriz sartzen utzi».

Ikerketa zabaldu dute

Espainiako Poliziak ikerketa zabaldu du gertakarien harira. Nueva Montaña taldeko presidente Mateo Sainzek aditzera eman duenez, berak zuzentzen duen klubak bideo bat jarriko du polizien esku, erasotzaileak identifikatzeko. Sainzek berak grabatu zuen bideoa, jazarleen atzetik korrika eginda.

Kantabriako Futbol Federazioko presidente Jose Angel Pelaezek, berriz, adierazi du espediente bat zabalduko duela, eta jakinarazi du «dagozkien autoritateen aurrean» salatuko duela. Bien bitartean, Osasunak «ikerketa oro» babestuko du. Sarasuak neurriak hartzea hobetsi du: «Bestela, berdin segituko dute. Gaztetxoek pentsatuko dute 'Ze ona, goazen iseka egitera'. Eta gauzak ez dira horrela». Egoera «gogorra baino gehiago, tristea» izan zela azpimarratu du Sarasuak, eta jazarleen adinarekin lotu du hori: «Mende honetan halako pentsamoldea duten 16-17 urteko jendea egotea, horren matxista... Tristea da, eta pena ematen didate». Lekukoen arabera, erasotzaileak adingabeak dira.

Halako jarrerak eten daitezen hitza hartu du Sarasuak. Hark eta haren taldekideek gehiago bizi behar ez dezaten, baina, batez ere, atzetik datozenak gaitz horretatik libratu daitezen. Hori izan da salatzeko izan duten akuilu nagusia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Aritz Elustondo, Imanol Alguacil eta Mikel Merino, Zubietan egindako azken entrenamenduan. ©MANIX DIAZ DE RADA / REALA

Irabazteko garaia du

Jon Ander De la Hoz

Realak hiru puntuak behar ditu Sturm Grazen aurkako partidan, Europan ondo kokatzeko. Ustez, multzoko kontrariorik ahulena da

 ©MONIKA DEL VALLE / FOKU

«Azken urte eta erdian asko sufritu dut; burumakur nengoen»

Mikel O. Iribar

Azken hamasei hilabeteak ez dira garairik samurrenak izan Zaratamokoarentzat, hainbat arrazoirengatik. Pixkanaka, sentipen «hobeagoak» ditu. Bihar, Lasoren aurkako partida erabakigarria jokatuko du, Zallan.
Tinara Moore Gernikako jokalaria, atzo, Malosten. ©MONIKA DEL VALLE / FOKU

Gernikak ezin izan dio irabazi Roche Vendeeri, Eurokopan

Berria

Bizkaitarrek 78-90 galdu dute Frantziako taldearen aurka, Eurokopako bigarren jardunaldian, Malosten

Natalia Arroyo Realeko teknikaria, Levanteren aurkako neurketan. ©Gorka Rubio / FOKU

Arroyo: «Talde ona dugu, ilusioa pizten duena»

Jone Bastida Alzuru

Natalia Arroyo Realeko entrenatzaileak adierazi du Realaren proiektuan sinesten duela, eta azpimarratu horren parte izaten jarraitu nahi duela. Goiko postuetan egon nahi du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.