Konpartsen jaitsiera, urtebetetze festaren atarikoa

Aste Nagusia ofizialki hasi baino bi ordu lehenago alaitu dute giroa konpartsek. 40 urte bete duten konpartsak omendu dituzte
Konpartsakideak jai giro betean, txupinazoa baino lehen.
Konpartsakideak jai giro betean, txupinazoa baino lehen. JAIZKI FONTANEDA / FOKU

Uxue Gutierrez Lorenzo -

2018ko abuztuak 19
Koloretako kamisetak eta banderolak, edariz hornitutako gurditxoak, ur pistolak eta puxikak izan ziren atzoko konpartsen jaitsierako protagonistetako batzuk. Urteroko ohiturari helduz, Bilbo Zaharreko plazan bildu ziren 29 konpartsetako ehunka kide, 17:00etan. Kalejira hasi baino ordu erdi lehenago ere zenbait konpartsak hasia zuten festa. Trikimailukoek puxika urdinez bete zuten plaza, eta parean zituzten Sin Kuarteleko kideak lehen izerdi tantak botatzen hasita, dantzan. Aise ikus zitekeen ere Tintigorrikoen bandera erraldoia, eta Txomin Barulloren erraldoia.

Aurtengo txupinera Aixeberri konpartsako kidea izaki, San Anton zubiaren parean zeuden pilatuta konpartsakideak, kalejira noiz hasiko zain. Irribarretsu eta dantzan, Saioa Dominguez txupinerari babesa emateko prest denak. Suziria piztu, eta puntu-puntuan hasi zen ibilbidea, Zazpikaleetan zehar. Ez ziren hain puntualak izan, ordea, konpartsa batzuk eta San Anton zubiaren beste aldean batu ziren festara Hau Pittu Hau eta Txinbotarrak-eko kideak, esaterako.

Bidea irekiz, txistulari eta danbor joleak, txapela gorria eta alkandora zuria soinean. Jarraian, Saioa Dominguez txupinera eta Zorion Egileor pregoilaria, besotik helduta eta emozioz gainezka. Fanfarreak lagunduta, kamiseta urdin eta laranja jantzita jarraitzen zioten Aixeberriko kideek euren ordezkariari. Zubia igarota, Somera kalean barrena murgildu ziren. Bozgorailuetako musikarekin batzuk, trikitia eta pandero doinu artean besteren bat. Batukada feminista antolatu zuenik ere bazen: jaia hasia zen jada Bizkaiko hiriburuan. Poliki baina etenik gabe heldu ziren ordu eta erdiko ibilbidea eginda 29 konpartsak Arriaga plazara, dantza eta kantu artean.

Zortzikote historikoa

Aurtengo Aste Nagusiak berezitasunik badu, urtebetetze festa da hori. 40 urte betetzen ditu, eta, harekin batera, zortzi konpartsak. Jaitsieran ere horri keinu egin nahi izan zioten, eta txupinerari zegokion konpartsaren atzetik joan ziren zortziak, bata bestearen atzetik jarraian. 40 handi bat ikus zitekeen Tintigorrikoen kamisetetan, Pinpilinpauxako tximeletekin dantza ari zirelarik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna