Donostiako Nazioarteko 65. Zinemaldia. BASQUEWOOD

Barre algara ozenen alde

Urtzi Urkizu

2017ko irailak 27
Barre guztiak ez dira berdinak, zinema aretoetakoak ere ez. Kontu bat da barre txiki bat egitea, eszena batean zerbait pizgarria topatu duzulako edo txinparta bat egon delako. Eta beste bat, pertsonaien gorabehera bortitz batzuekin barre algara ozenetan erotzen hastea. Erotzea, baina zentzurik onena aintzat hartuz.

Barre txiki batzuk atera zaizkigu Antonio Cuadriren Operación Concha pelikularekin. Jordi Mollak bi pertsonaia jokatzen ditu, eta haren ibilera batzuekin egin dugu irri. Baina pasatu gabe. Zinemaldiaren egunetan girotutako komedia arina da, iruzurgileen istorio bat, denbora-pasarako. Aktoreak ondo daude, baina hori da dena. Entretenimendu jostagarri bat.

Askoz ozenagoak izan dira Non filmak eragin dizkigun barre algarak eta sentipenak. Eñaut Castagnetek eta Ximun Fuchsek zuzendutako pelikula road movie faltsu bat izan daiteke, edo western sozial alternatibo bat. Diru gutxi baina ahalmen asko nabari dira ekoizpenean. Lan herrikoi bat da. Eta umore basatia tragediarekin tartekatzen ikusi dugu, Bruno pertsonaia indartsuaren begietan. Fuchsek berak jokatzen du rol hori, oholtza gainean erakutsi ohi duen trebeziaz. Gizaki bat zartatu, eta «sistemari ez» esatea erabakitzen duenan, nola eragiten dio horrek bere inguruari? Nola erantzuten dute senideek, lagunek? Istorio interesgarri bat dute kontatzen Castagnet eta Fuchs lehengusuek. Brunoren bidaian, tragediaren muturreko ibilerek erotasun puntu iradokitzailea dute. Ikuslea ere zartatzen dute, hesteetako umorearen barne sistema korapilatsu bat oihuka hasiko balitz bezala.

Jakin dugu bi lehengusuek zinemarako duten hurrengo proiektua euskaraz izango dela. Asko poztu gaitu berriak. Datozen Zinemaldietan barre algara ozenak egiten jarraitu nahi dugu eta. Euskaraz mintzatzen diren Bruno bezalakoekin bada, are hobeto.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna