Bi umeren gorpuak aurkitu dituzte Aturri ibaian itota, Baionan

Bi umeren hilotzak aurkitu zituzten ostiral gauean, Aturri ibaian itoak. Ur bazterretik hurbil zeuden, Baiona eta Mugerre (Lapurdi) arteko bide ondoan. 6 urteko mutiko batena eta 4 urteko neskato batenak dira gorpuak. Lehenago, bi umeen ama aurkitu zuten sokorri zerbitzuek, ibaiaren beste aldean, errepide bazterrean biluzik.

Baionako prokuradorearen arabera, 41 urteko emakumea «eldarnioan» zegoen, eta «hitz jario inkoherentea» zeukan; adierazi duenez, ez zegoen Poliziaren galderei erantzuteko egoeran, eta erietxe psikiatriko batean sartu behar izan dute.

Umeen aitak, abisua

Samuel Vuelta Simon Baionako prokuradoreak azaldu duenaren arabera, bi umeen aitak eman zien abisua sokorri zerbitzuei. Lanagatik kanpoan zegoen, eta, emazteak erantzuten ez ziolako kezkatuta, jendarmeei abisatu zien. Familiak Kanbon (Lapurdi) duen etxera iristean, ez zuten nehor aurkitu. Hori ikusita, jendarmeek Baionako Poliziari dei egin zioten, eta horiek emakumearen sakelakoaren geolokalizazioaren bidez jakin zuten non zegoen.

Vuelta Simonen hitzetan, «bipolaritate arazoak» dauzka emakumeak, eta lehenago ere aurkitu izan dute «nora ezean». Litekeena da bi umeekin batera ibaira sartu eta urak eraman izana. Baionako Polizia judizialak ikerketa bat martxan jarri du gertaturikoa argitzeko.