Huts egin zuen lehen ahaleginean, bigarren etapan, baina Caleb Ewanek (Lotto Soudal) jada neurria hartu dio aurtengo Italiako Giroan esprintean irabazteko moduari. Txirrindulari australiarrak asteazkenean lortu zuen aurreneko garaipena, bosgarren etapan gailenduta, eta atzo, bigarrenez nagusitu zen, zazpigarren etapan. Hark izan zuen berriz pedal kolperik indartsuena azkeneko zuzengunean. Davide Cimolai (Israel) eta Tim Merlier (Alpecin) sailkatu ziren haren atzetik. Ewanek bost etapa ditu irabaziak jada Giroan bere kirol ibilbidean.
Sailkapen nagusian, ez zen izan aldaketarik, eta Attila Valterrek (Groupama) maglia arrosari eutsi zion. Gaur sua egon daiteke, etapa gorabeheratsua baita zortzigarrena. Hirugarrenez Giro honetan, goian amaituko da, Guarda Sanframondin. Hiru kilometroko igoera da, baina %10eko pendizako hainbat aldapa ditu bidean.
Nafarroako Klasikoko bigarren eta azken etapan, berriz, Arlenis Sierra kubatarrak (Monex) ezustea eman zuen, eta garaipen handia lortu zuen, Ruth Winderri (Trek) eta Annemiek van Vleuteni (Movistar) esprintean gailenduta. Eider Merino (Monex) izan zen aurreneko euskal herritarra, 22. postuan, bederatzi segundora.
Mallorcako Challengeko bigarren saioa ere jokatu zuten atzo, eta Jonathan Lastrak (Caja Rural) oso gertu izan zuen garaipena. Bigarren izan zen, Jesus Herradaren atzetik (Cofidis).
Italiako Giroa
Jada neurria hartu dio
Caleb Ewanek bigarrenez irabazi du Italiako Giroan, eta Attila Valterrek eutsi egin dio maglia arrosari. Goian bukatuko da gaurko etapa
Iruzkinak
Ez dago iruzkinik
Ordenatu