Gobernu osaeraz adostasunik ez

Geroa Baik, EH Bilduk, Ahal Dugu-k eta Ezkerrak Nafarroako gobernu programa hitzartu dute, baina oraindik ez gobernu osaera, eta ikuspuntu desberdinak dituzte. Uxue Barkos Geroa Bairen presidentegaiaren proposamenarekin ez dago ados EH Bildu koaliziokide Sortu. «Ez dugu bat egiten gobernuaren ikuspegi presidentzialista batekin», esan du Pernando Barrena Sortuko eledunak Euskadi Irratian. «Teknikoek gidatutako gobernuaren» planteamenduarekin ere ados ez daudela jakinarazi du Barrenak.

Barkosek proposatu du kontseilariek ez dutela kargu organikorik izan behar alderdietan, eta foru parlamentari ere ezin direla izan. Halaber, esan du alderdi bakoitzak Geroa Bairekin negoziatu behar duela kontseilariaren izendapena. Adolfo Araiz EH Bilduko parlamentariak egunotan adierazi du gobernu egituraz bestelako iritzi bat dutela, baina akordiorako tartea ikusten duela.

Hilaren 20an izango da lehendakaria hautatzeko saioa.