Jendetzarik gabeko Zinemaldia

Ezohiko irudia eman zuen atzo Donostiako Zinemaldiak. Woody Allenen Rifkin's Festival-en goizeko emanaldiarekin hasi zuen aurtengo bidea jaialdiak, eta ohikoa ez den baretasun bat nabari zen Kursaalaren kanpoaldean. Aretora sartu behar zuten ikusleek ere ez zuten ilara luzerik sortu. Ezberdina da aurtengo Zinemaldia, eta hori nabarmena da Kursaalaren kanpoaldean, baina baita Maria Cristina hotelaren inguruetan ere. Iritsi, iritsi ziren hainbat aktore eta zinemagile atzo Donostiara, baina ez zeukaten inor zain sinadura edo selfie eske.