Albistea entzun

KRITIKA. Antzerkia

'Lasciate ogni speranza'

Agus Perez -

2021eko azaroak 17

'El diablo en la playa'

Konpainia: Matarile. Testuak eta zuzendaritza: Ana Valles. Beste testu batzuk: Celeste, Claudia Faci. Koreografia eta interpretazioa: Celeste, Claudia Faci. Eremu eszenikoa eta musika muntaketa: Baltasar Patiño. Lekua: Donostiako Gazteszena. Eguna: Azaroak 13.

Princeren Purple Rain pasarte musikatuan murgilduta eman ditugu Donostiako Gazteszena aretoan emanaldia hasi aurretiko minutuak. Gozamen hutsa izan da atariko tarte hori, bikain sonorizatuta egoteaz gain, oso doinu iradokitzaileak izan direlako, izpirituaren bizigarri, esan genezake. Gainera, Galiziako Matarile konpainiaren lan bat ikustera goazenok seguru gaude gauza iradokitzaile eta bizigarri batez gozatzera etorri garela, eta hasierako itxarote hori jarraian etorri denaren aperitifa baino ez da izan.

Erridaua zabaldu da azkenean, eta han agertu da disposizio eszeniko pertinentea, interpreteen mugimenduaren euskarria izan dena eta haien eboluzioei esangura eman diena. Alfonbra iletsu zuria hondo-ezkerreko bazterrean, L formako mahai lerroa eskumakoan eta telebista bateko platokoak ziruditen bost besaulki ultramoderno izan dira elementu eszeniko bakarrak. Egia esan, eskumako alboa bete duen hogeita zortzi led fokuz egindako horma elementu eszenikotzat ere har dezakegu, eta horrela gauzak korapilatzen hasi, hain izan dira elkarlotuak eta esanguratsuak emanaldia osatu duten musika, argiak, jantziak... Hau da, osagai eszeniko guztiak.

Ohikoa den legez, Baltasar Patiñoren musika muntaiak eta argien diseinuak —azken hori Miguel Muñozekin elkarlanean egina— gidatu gaituzte El diablo en la playa (Deabrua hondartzan) honek proposatu digun bidaia etiko eta estetikoan zehar. Askok esaten dute Ana Vallesek beti egiten duela antzezlan berbera —orduan, zergatik joaten gara bere estreinaldi guzti-guztietara?—, baina nik esango nuke lan honetan gutxienez koska bat aurrerantz jo duela artearen interpretazioan, oraingo proposamenean erabateko zentraltasuna eman baitie bi interpreteen gorputzen fisikotasun bereziari eta presentzia eszeniko artegagarriari.

Bide batez esanda, Valles eszena gainean ikusten ohituta gaudenontzat bitxia egin zaigu Claudia Facik Vallesekin duen antzekotasun harrigarria, eta alde horretatik Vallesek berak aitortu digu bere alter ego moduko bat plazaratu nahi izan duela Faciren pertsonaiaren bidez. Hala ere, «lasciate ogni speranza», esango nioke pertsonaia zehatzen bila etorritako ikusleari: hemen ez dago halakorik. Hemen dagoena artearen bilaketa desesperatua da; poesiaren, erotismoaren eta anabasaren aldarrikapena; azaldu ezinaren errebindikazio temati bezain erostezina; gorputz biluzien esangurak gugan uzten duen arrasto sakona; edozein logikatik harago doan bilaketa determinatua.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

«Areto txikiak maite ditut; hor, bazara edo ez zara, eta ni banaiz»

«Areto txikiak maite ditut; hor, bazara edo ez zara, eta ni banaiz»

Edurne Elizondo - Nafarroako Hitza

Aitak oparitutako gitarrak jarri zuen Aurora Beltran musikaren bidean, duela 50 urte. Tahures Zurdos taldeak markatu du bide hori, nahiz eta musikariak bakarrik grabatu dituen bere azken diskoak. Tahures 2019an itzuli zen; Beltran ez da inoiz joan.

1 ©RAUL BOGAJO / @FOKU

Artea hezkuntzari so

Aitor Biain

'Pentsatzeko leku bat. Arte eskola eta praktika esperimentalak Euskal Herrian 1957-1979' erakusketa jarri du Artiumek. Ekainaren 5era arte egongo da zabalik
<em>Zura eta ura</em> egitasmoaren sortzaile eta sustatzaileak, Aquariumeko atzoko aurkezpen agerraldian. ©MAIALEN ANDRES / FOKU

Itsas portuen erradiografia bat

Alex Uriarte Atxikallende

Argazkilaritza eta literatura uztartzen dituen 'Zura eta ura' egitasmoa aurkeztu dute Aquariumean
Langile bat Donostiako Trueba zinema aretoak desinfektatzen. ©GORKA RUBIO / FOKU

Kulturak 2021ean emandakoaren errepasoa dakar 'Jakin' berriak

Erredakzioa

Ismael Manterolak eta Ainhoa Urienek idatzi dituzte 247. zenbakiko artikulu nagusiak. Beste hainbat sinadura ere bildu dituzte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.