Kalte-ordainak eskatuko ditu defentsak, «akats judiziala» argudiatuz

Iñigo Iruin defentsaren abokatua agerraldian mintzatu zen, atzo, eta adierazi zuen «borroka juridikoa» ez dela amaitu. Horregatik, «[Espainiako] estatuaren ondarezko erantzukizuna» eskatuko dute, «justizia administrazioaren funtzionamenduak eragindako kalte nabarmenengatik». Hau da, kalte-ordainak erreklamatuko dituzte. «Argudio juridikoetan luzatu gabe, nahikoa da gogoratzea sei urte eta sei urte eta erdiko kartzela zigorrak», nabarmendu zuen. Horretarako, «akats judizialaren bidea» ibiliko dute.

Espainiako Auzitegi Gorenak herenegun kaleratutako epaiari dagokionez, «sinplea, oso ulerterraza» dela iruditzen zaio. «Argudio bakarra da Europako Giza Eskubideen Auzitegiaren epaiak juridikoki lotesleak direla, bete beharrekoak». Iruinek azpimarratu zuen Gorenak, «orain», ez duela «inongo zalantzarik» eduki. «Orain aitortu du ez zutela zigortuak izan behar».